Anthony Joshua a ropui leh ta
Khawvel ngaihven inhnek hmuhnawmah nimin khan Anthony Joshua a ropui leh ta a, British boxer hian Andy Ruiz Jr chu unanimous decision (118-110, 118-110, 119-109) in a hneh.
Diriyah Arena, Saudi Arabia-a inhnekah hian Joshua ṭantu an tam a, fans 14,000 zet pungkhawm chu "AJ" tiin an au rual - British boxer-in an duh result a pe a, a kawnghren hloh tawhte a nei let leh ta.
Joshua hian June thla khan Ruiz hi rin loh takin a ngam lo a, IBF, WBA leh WBO world heavyweight title chu a pumrua en reng pawha ani aia ṭha lo zawka ngaih lakah a hloh.
Mahse, Pathianni zingah erawh thawnthu a danglam ta - Joshua leh khawvel a barakhaih ṭuma lawm taka Ruiz a zuang ang mai khan Joshua a zuang ve ta thung a, a hmuna entu ten lawm taka kut beng chungin Joshua lawmna
an ṭawmpui.
A hmuhnawm
Joshua hma hian boxing khawvelah Muhammad Ali, Lennox Lewis, Evander Holyfield, Mike Tyson leh Floyd Patterson te chu world heavyweight title an hloh hnua nei let lehnghal thei an ni. Saudi Arabia-ah mi ropui kianga a hming ziak lang ve turin Joshua-a'n theihtawp a chhuah a, first round-ah Ruiz-a vei lam mit chungah a hnek kak nghal.
Ruiz-a corner lama awmten, "Andy theihtawpin aw," tiin aw rawl lo chhuah ṭhin mah se tun ṭum erawh a dan a dang a, June-a a ngam tak boxer khan a class sanzia a pholang tawh tlat! Joshua che vel a hmuhnawm a, Ruiz-a'n huaisen takin bei ṭhin mah se a lu chet hun a hria a, a kut lek chhuah hun a hria a, a body movement lah thlir ninawm loh a ni - a tawpah Joshua a chak ta.
Hmabak chu
Ruiz a hneh hnu lawkah Joshua chuan American Mexican boxer hian a vawi thum nana inhmachhawn leh a duh a nih chuan a inhawn thu a sawi a, Ruiz chu hemi chungchang sawi hmasatu a ni. Vawi 35 inhnek a hmachhawna a vawi hnih nana tlawm ve chauh Ruiz chuan, "A vawi thum nana in hmachhawn leh ka duh a, nangni pawhin in hmu leh duh a ni lawm ni," tiin fan-te a zawt zui.
Kum 30 mi Joshua chuan, "A duh a nih chuan kan ti leh ang, in hre vek tawh a ni lawm ni," tiin a sawi zui a, hetihlai hian Tyson Fury leh Deontay Wilder hming theihnghilh loh a ṭha. World Boxing Organisation president Francisco Varcarcel chuan Joshua hi Ruiz a hneh aṭanga ni 180 chhunga Oleksandr Usyk hmachhawn turin a lo hrilh ve thung a, WBO title chu Usyk nena inchuh turin a ti.
Ka lawm takzet a, ka hnuk a ulh hial a ni. Tihsual nei ṭhin mihring ve tho ka ni a, mahse tlu hlen loin ka tho leh a, ka tihsualte ka siamṭha ṭhin. Ka hmaa inchhawp apiang hmachhawn turin ka inpeih a, WBO-in ni 180 chhunga inlan turin min duh tih ka hria a, nuamti takin ka ti leh mai ang. Wilder leh Fury pawh va cho ka tum lo a, an duh chuan min rawn cho rawh se. Ruiz hian huaisen takin chu chu a ti a, sulhnu a hnutchhiah ta a nih hi.
- Anthony Joshua
Tun aia training hautak zawk nei tur ka ni a, ka team leh coach-te thurawn ka ngaithla tawk lo a ni. He fight hmachhawn tur hian ka rit mah mah a, ka duh ang pawhin ka che thei lo. A vawi thum nana inhmachhawn ka duh a, tun ai hian ka ṭha zawk ang tih ka sawi ngam.
- Andy Ruiz Jr.