Chelsea coach thar Liam Rosenior

Chelsea chuan Strasbourg manager Liam Rosenior chu an coach atan an la lut ta a, kum nga leh a chanve chhung atan contract an ziahpui - kum khat dang pawhsei theihna dan an ziak tel bawk.

Club World Cup champion Chelsea hian an coach Enzo Maresca chu kum thar ni takah an ban a, coach turin Ligue 1 lama Strasbourg enkawltu Rosenior an la lut ta.

Rosenior chuan, "Club ropui tak, Club World Cup champion hial ni thei enkawlna chance ka neih hi ka hnar phal lo a ni," a ti a, Stamford Bridge chu phur taka a pan thu a sawi.

Kum 41 mi coach chuan, "Chelsea Football Club head coach ni tura ruat ka ni hi ka tan chuan chawimawina ropui tak a ni," a ti a, "He hna thawk tura rin ka ni hi ka lawm hle. Chelsea coach ni tura min ringtute zawng zawng chungah lawmthu ka sawi a, he club hi a phu ang ngeiin hlawhtlinna chanpui ka inbeisei a ni," a ti bawk.

Wayne Rooney-a'n Derby County a enkawl laia assistant coach lo ni tawh Rosenior hian coaching lamah sulhnu hrawl tak sawi tur a nei lo a, player a nih lai pawhin a chuti lua lo.

Fulham, Reading, Hull City leh Brighton & Hove Albion tan Premier League lamah a lo inlan tawh a, a hun tam zawk erawh Championship lamah a hmang thung.

Derby chu June 2022 - September 2022 inkar kha coach lailawk niin a lo enkawl tawh a, Hull City chu November 2022 - May 2024 thleng khan a lo enkawl tawh.

July 2024 khan Strasbourg a enkawl ṭan a, season hmasa khan Ligue 1-ah pasarihna nihpuiin, season kal mekah pasarihna tho a nihpui mek bawk - match 17 an khelh tawhah vawi sarih an chak a, vawi thum draw neiin, vawi sarih an tlawm.

Rosenior-a sulhnu en chuan Chelsea fans tan lawma zuanna tur a vang tih a lang a, mahse, coach hmabak nei êng tak a nih avangin beisei aia ṭha result a nei ve thei tho bawk.

English coach chuan, "Strasbourg hi ka damchhung zawngin ka hmangaih tawh dawn a, mahse, Chelsea sawmna hi ka tan hnar phal chi a ni lo a ni," a ti.

Strasbourg hi Chelsea neitu Todd Boehly leh a thawhpui Clearlake Capital-te ta BlueCo hnuaia mi tho a ni a, a tawi zawnga sawi chuan Blues hian an club pakhat zawka coach kha London lamah an hruai lut a ni ber.

Rosenior hi Strasbourg-a a thawhpui, first-team coach Kalifa Cisse, assistant head coach Justin Walker leh head of analysis Ben Warner ten an zawm dawn a, Chelsea-in thil thar an hmu dawn niin a lang.

London club hian Maresca tel loa an match hmasa berah Manchester City chu 1-1 in an inhnehtawkpui thei a, zanin dar 1:00 hian league match khel turin Fulham an lenchilh zui ang.

Rosenior hian zaninah a team a la kaihruai hman dawn lo a, Inrinni zana FA Cup third round-a Charlton Athletic an hmachhawn hunah erawh a enkawl tawh dawn thung.