R. Mala a chak, Mizoram an che ṭha lo

9th Elite Men's & Women's National Boxing Championship chu January 4, Pathianni khan Greater Noida, Uttar Pradesh-ah khelh ṭan a ni a, Mizoram aiawha tel zingah Ramhlun North tlangval Lalrambuatsaiha leh Chaltlang nula Naom Chingsannuami te chauh an dam tawh. Nimin khan Services aiawha khel R. Malsawmtluanga'n first round-ah a khingpui awlsam takin a hneh. Inelna hi January 10, Inrinni thleng khelh a ni ang.

National Boxing Championship-ah hian Mizoramin mipa boxer paruk leh hmeichhe boxer panga an tir a, mipa lamah Lalkhawngaiha leh Samuel Zadeng te kum lama an naupan avangin an khel thei lo. Kumin inelnaah hian kum 2006-a piang chin chauh a tel theih. Hmeichhe lamah Churachanpur nula Melody Kilong-i'n NOC a neih loh avangin a khel thei lo bawk.