Amorim leh a hma lama United enkawltute

Manchester United-in Sir Alex Ferguson hnuah manager an thlak nasa a, record chhuanawm tak nei an awm meuh lo. Manager a ngheta lakluh bik thlirin Ruben Amorim hi record nei ṭha lo zingah a record a chhe lawrlak.

An chak percentage thlirin Amorim hian Premier League bikah 31.9% chauh a chak pha a, manager dang zawngin 50% an kai pha vek. Portuguese manager thlak tak Erik ten Hag khan May 2022-October 2024 chhung United a enkawl a, inelna hrang hrangah match 128 team enkawl hmanin 54.7% a chak a nei a, FA Cup leh League Cup a chawi bawk.

Ole Gunnar Solskjaer-a'n December 2018-November 2021 chhung a enkawl a, nomawi chawi lo mah se match 168 enkawl hmanin inelna hrang hranga a chak percentage chu 54.2% a ni pha.

The Special One 'Jose Mourinho' pawhin Ferguson a thlak zo lo a, Europa League nomawi erawh a chawipui tho. Portuguese manager hian May 2016-December 2018 chhungin match 144 a enkawl a, inelna hrang hranga a chak percentage chu 58.3% a ni pha daih. Mourinho hnuaiah United-in Europa League bakah FA Cup leh Community Shield a lakpui bawk.

Louis van Gaal-a'n July 2014-May 2016 chhung United a enkawl a, match 103 kaihruaiin 52.4% chak percentage a nei a, FA Cup a champion pui. Ferguson thlaktu David Moyes-a'n July 2013-April 2014 chhung manager hna a thawk a, thla 10 hnuah an ban. Scottish manager hian match 51 enkawlin 52.9% a chakpui a, season khat enkawl tling lo mah se Community Shield a lakpui hman.