City-in Guehi an hnaih zel
Manchester City chuan Crystal Palace captain Marc Guehi chu lakluh tumin an hel mek a, Pep Guardiola enkawl team hian thlasik transfer-ah English defender hi an la lut a nih pawhin a mak lo ang.
City hian Guehi ngaihven sa mah se, a tirah chuan club dang ang thoin nipui transfer-a a thlawna lakluh theih hun an nghak. Mahse, tun hnaiah City hi hliam vangin an buai.
Chelsea nena an inkhelah khan an defender pawimawh pahnih Josko Gvardiol leh Ruben Dias te chu an inhliam a, English centre back John Stones chu hliam vangin a chawl mek bawk.
City hian Gvardiol leh Dias-a te chawlh chen tur a zirin, na lehzuala Guehi hi umzui an tum nia sawi a awm a, nipui laia Guehi la lut hman teuh tak Liverpool tan thu hriat nuam a ni lo ang.
Palace lam pawhin nipui transfer-a a thlawna chân ai chuan an defender hi January-a hralh an pawi ti lo nia sawi a ni a, hliam vanga talbuai City-in sum an ren kher lo mai thei.
City defender inhliam zingah Gvardiol chu zai ngai a ni a, a ngal ruh hliam zai tur hi a chawlh chen tur erawh sawi fak theih a ni lo - a rei thawkhat ang tih erawh a rinawm.
Manchester khaw club hian an club academy chhuak defender Max Alleyne pawh loan-a a khelhna Championship club Watford aṭangin an ko kir tawh a, tlarhnung buaina chinfel an tum mek.
City boss Pep Guardiola chuan Chelsea nen an in draw zawhah khan, "Player inhliam kan ngah hle. John Stones hi engtia rei nge a chawlh tawh pawh ka hre lo.
"Ruben a inhliam ve leh a, Josko pawh kan chhawr thei dawn lo. Nathan Ake a inhliam reng a, kan tun dinhmunah chuan intih chak hram hram a, kan buaina chinfel dan zawn a ngai a ni," a ti thlawt.
Guehi hi EPL club ni lo zingah, Bayern Munich, Real Madrid, Barcelona, Inter Milan leh Atletico Madrid te pawhin lakluh an duh a, ram pawn club-te hi chuan nipuia la lut turin January-ah inremna an neihpui thei.
City hian an league match hnuhnung pahnihah an khingpui an draw ve ve avangin, EPL table-ah hmahruaitu Arsenal chu point ruk ngawtin an phak lo tawh a, zanin dar 1:00 hian league match-ah Brighton & Hove Albion an mikhual zui ang.