United enkawl tum lo Howe

Newcastle United coach Eddie Howe chuan Manchester United nena sawi zawm hlawh mah se, Old Trafford pan tumna a neih loh thu a sawi a, Thawhṭanni zana ban tak Ruben Amorim thlak tumna a nei lo.

Howe chuan, "Keimah aṭang chuan engmah a inthlak danglam lo. St James' Park-ah hian 100% in ka rilru ka pe a, theihtawp chhuahin hna ka thawk reng a ni.

"Media lama an thusawite ka ngaihven lo a, ka tan chuan awmze nei lo a ni. A pawimawh ber chu vawiina ka hnathawh dan a ni a, Leeds United khel tura a ṭha thei ang bera inpeih kan tum mai a ni," a ti.

Newcastle United hian zanin dar 1:45-ah league match khelh tur neiin, Leeds United an mikhual dawn a, beisei angin season hmang bik lo mah se, league match hnih chu a zawnin an chak leh tawh.

Howe chuan, "Ka hlim a, ka duh ang taka he team hmasawn zelna tura tha ka thawh theih chhung chuan khawdang ka hawi lo a ni," a ti a, Newcastle United-a zalen taka team enkawl chu nuam a ti.