O'Neill-a'n Celtic a enkawl dawn

Martin O'Neill chu Celtic enkawl turin Scottish club-ah a kir a, coach ban tak Wilfried Nancy a thlak ang - kum 73 mi coach hian tun season-ah Celtic hi vawi hnih a enkawlna tur a ni!

Celtic hi tun season-ah an talbuai - inhmuhthiam lohna avangin coach Brendan Rodgers chuan October khan a chhuahsan a, an club coach hlui O'Neill hian coach thar an zawn chhungin a enkawl lailawk.

Kum 73 mi coach hian match riat kaihruai hmanin, vawi sarih a chakpui. Mahse, December thlatirah Celtic-in coach atan Nancy an la lut a, O'Neill a chhuak zui.

Scottish club beisei angin thil a kal lo. French coach enkawlna hnuaiah match riat khelin, vawi hnih chiah an chak a, an tlawm zingah hian League Cup final-a chak loh a tel a, O'Neill lam an hawi.

2000-05 a Celtic a enkawl laia nomawi pasarih zet lo chawi tawh O'Neill chuan, "He hna ropui tak thawk tur hian sawm ka ni a, hnehna kan chan leh theih nan theihtawp kan chhuah dawn a, he club chhungkua thlawpna kan mamawh dawn a ni," a ti.

Scottish Premiership season hnuhnung 14-a vawi 13 champion Celtic hi table-ah pahnihna an ni mek a, hmahruaitu Hearts chu point rukin an phak lo mek.