Kudus-a'n Cherries hmachhawn dawn lo

Tottenham Hotspur boss Thomas Frank chuan, an league match hnuhnung bera hliam vanga lakchhuah ngai Mohammed Kudus chu zaninah a lan inlan theih loh tur thu a sawi.

Spurs hian zanin dar 1:00-ah league match khel turin Bournemouth an lenchilh dawn a, chak mamawh London club-in Kudus an chhawr thei lo tur hi chânna a tling.

Frank chuan, "Kudus hian vawiinah a hliam dinhmun tak hrechiang turin scan a nei dawn a, tun dinhmunah chuan engmah sawi chian theih a la awm lo.

"Mahse, Bournemouth erawh a hmachhawn loh a rinawm zawk," a ti - Spurs hi an league match hnuhnung pangaah vawi khat chiah an chak a, table-ah 13-na an nih mek avangin an tan season thara European football khelh ringawt pawh a harsa tawh dawn.

Hetihrual hian Spurs hi hliam vangin an buai ve fo tih erawh hriat telsak a ṭha a, Thomas Frank hian an ṭhat dan berin Spurs team hi a la rem meuh lo a ni ber!

London club hian chanchin lawmawm hriat tur erawh an nei ṭan a, thla ruk vel ngawt hliam vanga inkhel tawh lo Dominic Solanke-a'n training zawmin ngai a awh chho ṭan mek a, chhawr theih a nih thuai a rinawm - Cherries erawh a tan a la hma hret ang.

Match sarih ngawt hliam vanga inlan tawh lo Destiny Udogie-a'n training a zawm leh tawh bawk a, Frank chuan, "Destiny hian training zawmin ngai a awh chho a, chanchin lawmawm lam a ni e," tiin a sawi.