Fletcher-a'n chance khat a la nei

FA Cup third round-ah Manchester United-in January 11, Pathianni zan dar 10:00 hian Brighton an mikhual dawn a, Darren Fletcher-a'n team a la enkawl dawn. Red Devils hi an chak bakah game ṭha taka an khelh chuan Fletcher-a'n thuneihna a la chelh chhunzawm theih dan a awm.

Chutihrualin manager lailawk turin Fletcher-a khelhpui ṭhin Ole Gunnar Solskjaer leh Michael Carrick te hming a ri ring hle. Burnley nena an inhnehtawk zawhah Man United hotuten Fletcher an bia a, Brighton nena team enkawl turin an inbe fel a, match khat dang la enkawl thei dawn.

Man United manager lailawk Darren Fletcher chuan, "Keini tan draw hi a pawi takzet a, inkhel thlir pawhin kan vanduai. Goal chance ṭhahnem tak kan insiam a, goal khung pawm loh an nei a, vawi 30 zet shot kan nei a, goal khung tumin kan nawr na hle. Chak ngei tur chu kan ni," tiin an vanduai thu a sawi a, goal khung an pawm loh chu mak a tih thu a sawi lang bawk.

Inkhelh zawhah club thuneitute zinga mi chief executive Omar Berrada leh director of football Jason Wilcox te hmelah hlim hmel hmuh tur a awm lo. Chutihrualin manager leh player-te aiin Berrada leh Wilcox te hian tun hnaiah United chet ṭhat loah mawh an phur lian zawka ngaitu an ṭhahnem hle