Goal li khungtu Magpies chak hram

Newcastle United chuan Nilaini zan Premier League inkhelah goal li ngawt an khung a, mahse, Leeds United lakah an chak hram - Leeds hian goal thum an khung ve tho a, 4-3 in Magpies an chak.

Leeds United hian minute 90 a nih thlengin, 3-2 in hma an hruai! Mahse, Newcastle-in hun pek belhah goal hnih an khung a, an mikhual Leeds lakah 4-3 in hnehna hlado an chham.

St James' Park-a inkhelah, Leeds tan Brenden Aaronson chuan minute 32-na lekah goal mawi bik a khung a, mahse, an hlim authawm pawh a reh fel hmain Harvey Barnes chuan Magpies tan si phurh a sut.

1-1 in chawlhlawk an hmang mai dawn niin a lang tawh. Mahse, first half hun pek belhah Leeds-in penalty an hlawh chhuak a, tun season-a 'form' tak Dominic Calvert-Lewin chuan goal-ah a chantir.

Leeds hmahruai chhung erawh a rei lo. Second half ṭan aṭanga minute kuanaah Joelinton chuan si phurh a sut ve leh a, 2-2 a ni - goal a lut mawlh mawlh a ni ber a, inkhel entute mit a tlai.

Mahse, hetah hian a la tawp lo cheu! Minute 79-naah Aaronson chuan Leeds tan a goal hnihna a khung leh a, 3-2 a ni. Mikhual team hian rei tak hma an hruai a, an chak mai dawn niin a lang tawh.

Beisei angin thil erawh a kal lo - hun pek belh minute khatnaah Newcastle tan Bruno Guimaraes chuan penalty a chhuih lut a, 1-1 a ni. Leeds an nguai a, an nguaina chu belhchhahin a awm zui!

Harvey Barnes chuan hun pek belh minute 12-naah chakna goal a khung a, St James' Park thawm chu ring tak a ni. Newcastle an chak a, tun season-a a vawi khat nan league match thum a zawnin an chak ve ta.