Spurs an tlawm leh tawh

Tottenham Hotspur-in Bournemouth khelmualah, hma takah goal khung mah se, hun a tawp meuh chuan 3-2 in an tlawm a, coach Thomas Frank-a tan pressure a sang lehzual sawt.

Spurs tan Mathys Tel chuan minute nga lekah goal hmahruai khungin, London club tan beiseina a siamsak a, mahse, ṭum dang ang thoin Spurs hi an zuai leh vat!

Vitality Stadium-a inkhelah Cherries tan Evanilson chuan si phurh sutin, Eli Junior Kroupi chuan chawlhlawk hmain hmahruaina goal a khung zui a, 2-1 in chawlhlawk an hmang der!

Spurs-in tlawm erawh an tum bik lo. Minute 78-naah Joao Palhinha chuan overhead kick hmangin goal mawi bik a khung a, 2-2 a ni.

Minute 90 thlenga goal dang a luh loh avangin team pahnih hi an inhnehtawk tawh mai dawn niin a lang a, mahse, hun pek belhah Manchester City pan tur Antoine Semenyo a inlan.

Semenyo hian Cherries tana a match hnuhnung ber nia ngaih theihah chakna goal hlu bik a khung a, 3-2 in an chak - league match 11 zet a zawna an chak zawh tawh loh hnuah Cherries an chak a, an chakna chu chhuak tur Semenyo a ni.

Kum 26 mi Antoine Semenyo hi City chuan a release clause, pound maktaduai 65-a lei an rem ti tawh a, Etihad Stadium-ah kan hmu thuai dawn - January 10 ral hmaa City hi zawm hman turin an beisei.

Ghana international Semenyo hian Cherries tan season duhawm bik hmangin, league match 20 aṭangin goal 10 a khung tling ta a, assist vawi thum a nei bawk.