Mizo cricketer K-a a thi

Khaled Memorial 2nd Division Sreening Tournament 2025-26-ah nimin khan Venghnuai Raiders CC leh Chawnpui ILMOV CC te an inkhel a, VRCC opener K. Lalremruata chu lungphu chawlin a thi.

Inkhelh hi chawhma 9:02-ah Suaka Cricket Ground, Sihhmuiah ṭan a ni a, VRCC hian bat hmasain K-a hian ball 36-ah 40 runs a siam. A bat zo hi a thaw a hah thut a, a chah thlak zui avangin inkhel pawh tihtawp nghal a ni.

VRCC hian over 17.5-ah 78/1 runs siamin chawhma dar 10:30-ah inkhel an titawp. Maubawk tlangval K-a hi batsman leh wicketkeeper a ni a, Mizoram aiawh pawhin a fehchhuak tawh.

Mizoramin Ranji Trophy an khelh hmasak ber ṭumah K. Vanlalruata captain-na hnuaiah K-a hi a tel a, December 20-21, 2018 khan Shillong-ah Meghalaya nen an inhmachhawn. Ranji Trophy a khelh hnuhnun ber chu March 3-6, 2022 kha niin Eden Gardens-ah Nagaland nen an inkhel a ni.

Syed Mushtaq Ali Trophy-ah pawh Mizoram tan a inlan tawh a, February 21, 2019 khan Cuttack-ah Bengal nen inkhelin, a inlan hnuhnung ber chu November 8, 2021 niin, Mulapadu-ah Sikkim nen an inhmachhawn.

Mizoram assistant coach K. Vanlalruata chuan, "K-a hi player tough tak a ni a, a kianga awm a nuam. Ṭhian ngaina mi a ni a, kan zin ho ṭumah pawh a room-ah kan awm khawm ṭhin. Tun ṭum Mizoram team-ah pawh khan probables squad-ah a la tel a, min kalsan ta mai hi pawi kan takzet a ni," tiin Vanglaini a hrilh.