Palace-in Villa an chelh

Selhurst Park-ah chak beiseiin Aston Villa an lenglut a, mahse, Crystal Palace-in 0-0 a an lo chelh avangin hmahruaitu Arsenal hnaihna chance an hloh - table-ah pathumna an nih chhunzawm.

Villa hian hnehna chang se chuan, an club chanchina a vawi khat nan league match hmasa 21-a point 45 an hmuh hmasak ber an tawng tur a ni a, mahse, an hun ṭha neih an khawhral.

Season ṭantir lama beisei phak lo, tun hnaia goal khung uar leh ta Ollie Watkins-a'n Palace tlarhnung tan harsatna thlen ṭhin mah se, a pawimawh ber goal a khung thei lo.

Palace keeper Dean Henderson chuan Watkins-a chance neih a dansak bakah, Maxence Lacroix chuan goal ngei tura ngaih a lo dang bawk - hun tawp hnaih lamah Watkins hian woodwork a tihper cheu!

Morgan Rogers pawhin hmingchherna remchang nei mah se, engmah lo maiah a chantir a, Palace khelmualah Villa an chak zo lo.

Palace pawhin chakna chance an nei ve tho. Mahse, player chhuanvawr Jean-Philippe Mateta vanneih zan a ni lo a, Tottenham Hotspur aṭanga lakluh thar Brennan Johnson pawhin a chance neih ṭhat vawi hnih a hlah.

Season hmasa lawka Spurs tana goal 18 ngawt khungtu Johnson hi Palace-in tun thlasik transfer-ah an club player man to ber ni turin an la lut a, pound maktaduai 35 man lai a ni.

Villa lakah Palace tana a match hmasa ber a khel a, mahse, Spurs thuneitute inchhirna thlen turin goal a khung thei lo. Palace tan hian Yeremy Pino pawhin chance a nei a, mahse, hliam vanga lakchhuah Emiliano Martinez thlaktu Villa goalkeeper Marco Bizot chuan ṭha zetin a lo dang.

November 1 hnuah Palace hi mahni muala league match khelhah an la chak leh lo a, player inhliam an ngah avangin chhuanlam tur erawh an nei ṭha thung.