Thiago-a'n record a siam

Brentford striker Igor Thiago chuan Sunderland lakah goal hnih a khung a, a team chu 2-0 in hnehna a chanpui - Yehor Yarmoliuk chuan goal khat a thawh ve bawk.

Everton laka hattrick a siam hnu lawkah Thiago-a'n goal hnih a khung a, tun season-ah Brentford tan league match 21 aṭanga goal 16 a khungna chiah a ni - Brazilian player zinga season khata EPL-a goal khung hnem ber record a siam.

Kum 24 mi striker hma hian a hun laia Liverpool striker Roberto Firmino, Arsenal winger Gabriel Martinelli leh Wolverhampton forward hlui Matheus Cunha te chuan season khatah goal 15 an lo khung tawh a, player pathum record inṭawm hi Thiago-a'n a khum ta.

Thiago hian February 2024 khan Brentford hi Belgian club ṭha Club Brugge aṭanga zawm turin inremna a neihpui a, hetihlaia a man zat hi pound maktaduai 30 bawr vel niin, Belgian club transfer fee record a ni.

Brazilian striker hian February-ah Brentford zawm rem ti mah se, July-ah a zawm chauh a, mahse, hliamin tlakbuak zuiin, season hmasa khan match riat a khelhah goal a khung miah lo!

Tun season-ah erawh dam varin Thiago a inlan a, Brentford tan innghahna a tling - league match ruk chu a zawnin an tlawm ta lo a, hetih chhung hian vawi li chakin, vawi hnih an khingpui an draw.