Chelsea coaching staff a chiang

Chelsea chu coach thar Liam Rosenior hnuaiah a vawi khat nan zanin dar 1:30 hian an inlan dawn a, FA Cup third round-ah Charlton Athletic an lenchilh ang.

Chelsea hian kumthar ni takin an coach Enzo Maresca nena an inṭhen thu an tarlang a, rei pawh a liam hmain coach thar atan Rosenior an lakluh thu an puang.

Mahse, Ligue 1 club Strasbourg aṭanga an lakluh coach hian Ningani khan senior team training a enkawl ve ṭan chauh a, a hnuaia coaching staff turte pawh tihchian a ni ta.

English coach hnuaia coaching staff zingah hian coach lailawk Calum McFarlane pawh a tel dawn a, Blues Under-21 coach hi senior team coaching staff zingah promote a ni.

McFarlane hian Chelsea hi match hnih kaihruai hmanin, Manchester City chu 1-1 in chelh mah se, an hneh ngei tura ngaih Fulham lakah 2-1 in an tlawm a, heti chung hian senior team coaching staff zingah a tel chhunzawm dawn ta tho.

Strasbourg-a Rosenior-a thawhpui ṭhin Kalifa Cisse leh Justin Walker bakah McFarlane te chu first team coach an ni ang a, Ligue 1 club a Rosenior-a staff tho Ben Warner chu first-team analyst a ni ang.

Chelsea-a Head of Global Goalkeeping ni lai Ben Roberts chu goalkeeper coach a ni ang a, Set-piece department lamah Bernardo Cueva chu hotupa a ni dawn bawk.

Rosenior-a'n tawnhriat a la neih tam loh avangin Chelsea a kaihhruai dan tur hriat a châkawm a, a match hmasa bera a hmachhawn tur Charlton hi Championship club an nih avangin a vannei tiin a sawi theih.

Hetihrual hian karleh Nilainiah League Cup semifinal an khel zui dawn a, Arsenal nen an intawng dawn–kum 41 mi coach theihna tak tak kan hre chho dawn tihna a ni.

Blues hi inelna hrang hranga an match hnuhnung 11-ah vawi hnih chiah an chak a, November-a title beisei kha Champions League an khel phak ang em, tih chu zawhna a ni mek.

Chelsea neitu Blueco lam hian kum 2022-a Blues an enkawl aṭangin coach nghet panga an nei tawh a, hei vang hian tun hnaiah Chelsea ṭantute chuan club thuneitu lam duhkhawp lohna an lantir.

Blues hi discipline lamah an pachhe hle bawk! 2023-24 season ṭan aṭang khan red card vawi 11 hmu tawhin, yellow card 251 an hmu tawh bawk–hei pawh siam ṭhat ngai a ni.

A tawi zawnga sawi chuan Blues-in khelmual chhung leh pawn thlengin chinfel tur tam tak an nei a, Rosenior leh a nauten khelmual buaina an chingfel thei a nih chuan a pawn lam boruak chu an bengdai thuai thei ang–zaninah an hna a inṭan dawn e!