Real-in Super Cup final lut

Jeddah, Saudi Arabia-a Spanish Super Cup khelh mekah Real Madrid chuan Barcelona hmachhawn turin final an lut ve leh ta a, Ningani zan khan Atletico Madrid chu 2-1 in an hneh.

Madrid derby-ah Real-in goal khung turin hun an mamawh rei lo. Second 77-na lekah Federico Valverde chuan freekick aṭangin goal mawi bik a khung a, Atletico goalkeeper ṭha mi Jan Oblak meuh pawhin tih theih a nei lo.

Second half ṭan aṭanga minute 10-naah Real tan Rodrygo chuan a khung belh ve leh a, Los Blancos captain Valverde siamsak a ni–season ṭantir lama hmun chang lo Rodrygo-a'n goal a khung ṭan ve leh ta hi Real tan lawmna tur a ni.

Atletico Madrid tan Alexander Sorloth chuan minute 58-naah a khung ve leh a, mahse, hun tawp thlenga goal dang a luh tawh loh avangin Real Madrid an chak.

Diego Simeone-a team tan Julian Alvarez ke a hmui hleithei lo a, league match riat zet goal khung tawh lo striker hian Real lakah goal khungna remchang nei mah se, a chhawr lo.

Sorloth pawhin goal a khung hmain Conor Gallagher-a ball pek duhthusam khungna remchang a neih a chhawr lo a, a ui vawng vawng ang–Real-in hliam vangin Kylian Mbappe an chhawr thei lo a, heti chung hian an chak ta tho.

Spanish Super Cup final hi Pathianni zan dar 12:30-ah khelh a ni dawn a, Barcelona leh Real Madrid an inkhelh dawn avangin inelna thlengtu Saudi Arabia lam tan chuan final duhthusam tih loh rual a ni lo.

Super Cup khelh vangin La Liga chawlh ni lo mah se, tun kartawp inkhelah final khel tur team pahnih bakah semifinal-a chak lo Athletic Bilbao leh Atletico te an inlan thei dawn lo a ni.