A vawi khat nan Manchester City vs Exeter

FA Cup third round-ah zanin dar 8:30 hian Manchester City leh Exeter City te an inkhel dawn a, club pahnih hi an vawi khat inhmachhawnna tur a ni. Exeter hi League One club an ni a, kum 125 upa niin Man City hi kum 139-a upa an ni thung. Kum 100 chuang club pahnih hi an la inhmachhawn ngai lo.

Man City-in Premier League champion tumin Arsenal um viau mah se match hnuhnung pathumah an khingpuite lakah point thum chauh an hlawh chhuak. Pep Guardiola hote hian match hnuhnung pathumah hian chak loh an nei lo a, chutihrualin chak an neih loh vangin Exeter lakah chak ngei an tum dawn.

Nilaini zan khan City hian Brighton hmachhawnin 1-1 in an inhnehtawk a, Etihad Stadium-ah Pep-a hoten beisei an pha lo. Spanish manager hian League One club a hmachhawn dawn avangin player a siksawi a ṭul a, ni sarih chhungin Newcastle United (League Cup semifinal) leh Manchester United (Premier League) te an hmachhawn dawn avangin player thlan thiam a ṭul dawn.

City manager Pep hian Seagulls lakah goal an khung theih loh vanga point thum hmu loah a inngai a, Exeter lakah tupawh khel se goal khung an ngai pawimawh dawn. Club pahnih hi an inthlau a, an inkhel tur hi Davida leh Goliatha inhmachhawn ṭum nen an khaikhin hial.

Man City hian kum khatah Exeter sum lakluh let 100 vel daih an la lut. Kar khatah Erling Haaland-a'n pound nuai nga vel a hlawh laiin Exeter player pumpui kar khat hlawh hi pound 2,000-3,000 chauh a ni.

Hei chauh hi a ni lo a, Exeter enkawltu hi club ṭantute 'Exeter City Supporters' Trust' an ni. City hnenah pawh club kal zelna atan inkhela an sum hmuh pe ṭhin turin an dil hial zawk. Chutihrualin football-ah thilmak thleng ve fo a, Exeter hi an chak a nih chuan City leh Pep-a tan mualphona a ni ang.

Man City-in nimin khan Antoine Semenyo-a'n an lakluh thu an puang. FA Cup-ah Pep-a'n a chhawr nghal a rinawm lo zawk. Chutihrualin League Cup semifinal-ah Semenyo hmel hmuh tur a awm tawh a rinawm a, Manchester Derby-ah phei chuan khel ngei tura ngaih a ni.