Ramhlun FC-in chakin bul an ṭan

11th All India Chief Minister's Gold Cup-ah Mizoram aṭanga tel Ramhlun FC chuan January 8, Ningani tlai khan an match hmasa berah Sikkim Police 2-1 in an hneh. RFC tan Malsawmtluanga Hrahsel leh Lalnunzira Sailo ten goal an khung.

Inelna hi Jorethang Public Stadium-ah khelh a ni a, Ramhlun FC hi Samson Ramengmawia'n a enkawl. RFC hian hlawhtlinna chan ngei tumin Aizawl FC player K. Vanlalhriatzuala leh T Malsawmzuala bakah Santosh Trophy-a Mizoram player ṭhenkhat an hruai tel.

Chief Minister's Gold Cup-ah hian team 16 an tel a, India ram pawn aṭangin Church Boys United (Nepal) leh Paro FC (Bhutan) te an tel. Sikkim pawn lam aṭangin Ramhlun FC bakah Oil India FC, Neroca FC (Manipur), Sudeva FC (Delhi), New Town Sports Academy (Kolkata), NSSC club (Shillong) leh BSF (Jalandhar) te an tel bawk.

Ramhlun FC hian January 12, Thawhṭanni chawhnu dar 2:00-ah BSF (Jalandhar) an hmachhawn dawn a, hnehna an chang a nih chuan seeded team zinga mi Paro FC (Bhutan) nen an inkhel ang. Champion hian nuai 20 an dawng dawn a, pahnihnain nuai 10 an dawng thung dawn.

Inelna hi Jorethang Football Association-in Sports & Youth Affairs department (Govt Sikkim), Sikkim Football Association leh Maghey Sankranti Mela 2026 buatsaihtute nen ṭangkawpa an huaihawt a ni.