Mizoramin medal an hnek chhuak lo

9th Elite Men's & Women's National Boxing Championship-ah Mizoramin mipa boxer paruk leh hmeichhe boxer panga an tir a, medal hlawh chhuak an awm lo. Inelna hi Greater Noida, Uttar Pradesh-ah neih a ni a, vawiin hian zawh a ni ang.

Mipa lamah Ramhlun North tlangval Lalrambuatsaiha a thleng sang ber a, pre quarterfinal-ah Rajasthan boxer split decision-in an hneh lo. Hmeichhe lama thleng sang ber Naom Chingsannuami pawh split decision thoin quarterfinal-ah a tla ve bawk.

Tun ṭum inelnaah hian kum 2006-a piang chin khelh theih a ni a, Lalkhawngaiha leh Samuel Zadeng te kum lama an naupan avangin an khelh phalsak a ni lo. Hmeichhe lamah Churachandpur nula Melody Kilong chu NOC a fel loh avangin a inlan thei lo bawk.

Mizoram tana medal la tura beiseina nei sang ber Zorammuana (Valtea) first round-ah a tla nghal a, Arunachal Pradesh boxer lakah a vanduai. Mega Boxing-a hming chher Lalruatmawia 'Diesel engine' pawhin inzir belhna tur a la ngah a, inelna thlengtu Uttar Pradesh boxer a hneh lo. Mizo boxer hnek na Vanlalhuala pawh Rajasthan boxer Uspender lakah a tlawm bawk.

Hmeichhe lamah Lalbiaknii, Vanlalrinngheti leh TC Lalremruati te an match hmasa berah an chak lo a, inzir belhna tur an ngah bakah an khingpuite an ṭha ve bawk. Mega Boxing vangin amateur boxing-in ngaihven a hlawh chho a, MIZBA-in an hmalakna ṭha tak hi an chhunzawm a nih chuan Mizoramin boxing-ah hma an sawn ngei ang.

Mizoram mipa team manager Rochungnunga chuan, "Mega Boxing hi a vawi khatna a ni a, beisei phak bakin amateur boxing-in ngaihven a hlawh phah. Mega boxing aṭang hian Amateur boxing ṭhatzia mi ṭhahnem takin an hre thar a, a hlutzia hi an hre belh zel dawn. Services tan R. Mala pawh a rawn inlan a, quarterfinal a paltlang avangin havildar-ah a kaisang dawn," tiin a sawi a, Mizo hmeichhe boxer hneh lohte chu Asia-ah pawh medal la theite an nih thu a sawi lang bawk.