AC Milan-in point hnih an hloh

10th January, 2026

Ningani zan Serie A inkhelah AC Milan chuan an mikhual Genoa chu hun tawp dawna Rafael Leao-a goal hmangin an draw hram a, 1-1 in an inhnehtawk. Milan hian point 39 hmuin table-ah pahnihna an awm a, hmahruaitu Inter Milan nen an inkarah point thum a awm. Inkhel dangah English striker Jamie Vardy telna Cremonese leh an mikhual Cagliari te 2-2 in an inhnehtawk.

San Siro-a inkhelah hian tir aṭangin Milan an chungnung zawk a, chance pawh insiam nghalin minute rukna lekah defender Matteo Gabbia hmangin goal an khung nghal teuh hle. Massimiliano Allegri nauten inkhel thunun zawk mah se an muthlu zeuh a, Genoa tan minute 28-naah Italian forward Lorenzo Colombo-a'n goal a khung hmasa zawk. Goal luh theih nan Ukranian midfielder Ruslan Malinovskyi chuan Adrien Rabiot a bum a, a ball pek ṭha zet chu Colombo-a'n box chhung aṭangin a khung.

Second half-ah Milan rawn insiamṭhain ball pawh an chang hnem. Minute 57-naah Christian Pulisic chuan an si phurh sutna goal khung theihna hun ṭha nei mah se ball-in goalline a pelh hmain a kuta a khawih hman avangin pawm a ni lo.

Minute 90 chhungin Milan-in siphurh an sut thei lo a, injury time-ah an sut hram. Hun pek belh minute hnihnaah AC Milan hun a inherchhuak a, veteran midfielder Luka Modric corner pet chu Rafael Leao-a'n goal-ah a chantir. Portuguese forward hian tun season-ah goal sarih a khungna chiah a ni.

Hun a tawp zui mai dawna a lan laiin Genoa chuan nawr thutin box chhungah Iceland forward Mikael Egill Ellertsson chuan Milan defender Zachary Athekame lakah penalty a hlawh chhuak. Romanian midfielder Nicolae Stanciu-a'n penalty hi petin a pet over a, 1-1 in inkhel a tawp.

Allegri hote hian Pathianni zan hian tun season-a beisei pha lo Fiorentina an tlawh lehnghal dawn a, chak tura rinkai zawk an nichungin Fiorentina-in Italian striker Moise Kean leh striker tawnhriat ngah Edin Dzeko an kawl bakah hming langsar an tam avangin Milan tan zuam sual theih an ni. AC Milan hian league champion nih a tum a nih chuan Fiorentina lakah an chetsual a thiang lo ang.