PSG-in nomawi an chawi

Trophée des Champions nomawi inchuhnaah PSG leh Marseille ten Jaber Al-Ahmad International Stadium, Kuwait-ah football hmuhnawm an pho chhuak. Hun pangngaiah 2-2 in an inhnehtawk a, penalty shootout-ah Luis Enrique hote 4-1 in an vannei ta zawk.

Ningani zan inkhelah Ballon d'Or kawltu Ousmane Dembele-a'n minute 13-na lekah PSG tan goal hmahruai a khung. Mahse, Marseille-in minute 76-naah Mason Greenwood penalty hmangin an sut a, minute 87-naah PSG defender Willian Pacho-a'n an lama a tihluh avangin hma an hruai ta zawk.

Enrique hote an vannei a, injury time-ah pawh minute nganaah Goncalo Ramos-a'n si phurh a sut a, 2-2 in inkhel a tawp. Penalty shootout-ah PSG aiawha pettu Ramos, Vitinha, Nuno Mendes leh Desire Doue ten an khung vek laiin Marseille tana pet hmasatu pahnih Matt O'Riley leh Hamad Traore ten an khung lo. PSG-in 4-1 ngawtin hnehna an chang.

Trophée des Champions-ah hian Ligue 1 champion leh Coupe de France champion te an inkhel ang a, English football-a Community Shield nen inang khatah a ngaih theih. PSG hian season liam ta khan nomawi chawi theih zawng zawng an hui vek avangin Ligue 1-a pahnihna Marseille nen Trophée des Champions nomawi hi an inchuh a ni.