Australian Open-ah Wawrinka inlan dawn

Grand Slam vawi thum lo champion tawh Stan Wawrinka chu a tennis khelh tawpna ber season-ah Australian Open khel turin 'wildcard' pek a ni a, tualchhung mi Nick Kyrgios erawh a inlan dawn lo thung.

Kum 40 mi Wawrinka hian ranking-ah pathumna hial a chelh tawh a, nikum December thla khan kumin season zawhah chawlh a tum thu a puang. Swiss tennis player hi kum 2014 khan Australian Open-ah a champion a, hei hi a Grand Slam hmasa ber a ni.

Wawrinka chuan, "2014 Australian Open-a kan champion kha ka inkhelh hun chhunga hlimna ber zinga mi a ni a, chuvangin tun ṭuma wildcard ka hmu leh pawh hi ka lawm hle. Ka season hnuhnung ber tura Australian Open khelh leh theihna hun ṭha ka nei hi ka tan a hlu takzet," a ti.

Tun dinhmunah Wawrinka hi ranking-ah 156-na a ni a, a title 16 lak tawh zinga a hnuhnun ber chu kum 2017 khan Geneva-ah a la a ni. Hetihlai hian Wimbledon finalist ni tawh Kyrgios chu men's singles-a khel tura a la inpeih loh avangin double-ah chauh a inlan dawn.

Kum 30 mi Kyrgios hi hliam vangin a inkhel hleithei lova, ranking-ah 670-naah a tla thla tawh. Australian star Kyrgios hi kum 2022 khan Thanasi Kokkinakis nen AO doubles-ah an champion tawh a ni.