Hmahruaitu Inter hmaa ding tur Napoli

Serie A hmahruaitu Inter Milan chuan Pathianni zan dar 1:15-ah Napoli an mikhual dawn a, team pahnihte hi champion inbeisei ve ve an nih avangin inkhel hmuhnawm kan hmuh a rinawm.

Inter hian an match hnuhnung berah harsatna awm loin Parma chu an khelmualah luhchhuahin 2-0 in hnehna an chang a, an chet ṭhat lai tak a ni. League match an khelh hnuhnung parukah hnehna chang vekin, an chak loh hnuhnun ber chu November thla daih tawh kha niin AC Milan chu 1-0 in an ngam lo.

Inter tan Denzel Dumfries chuan inhliam avangin Napoli a hmachhawn thei dawn lo a, Matteo Darmian pawhin a tihrawl a tihnat avangin a khelh dawn leh dawn loh a chiang lo. Mahse Inter-in full back te pahnih hmun ruak hnawhkhattu an neih ṭhat avangin lungngaihna tur an nei lo.

Cristian Chivu naute tan tlarhma lamah tun season-a goal 10 khung tawh Lautaro Martinez an nei a, ani thlawp tur hian Henrikh Mkhitaryan bakah Hakan Calhanoglu te an awm thei dawn bawk a, Napolo hneh thei turin an ṭha tawk.

Napoli pawhin hliam vangin Belgian duo Kevin De Bruyne leh Romelu Lukaku an la inlan thei dawn lo a, anni aiawh turin Manchester United tan pawha khel dun tawh Scott McTominay leh Rasmus Hojlund te bakah Stanislav Lobotka a awm thei dawn bawk.

Antonio Conte hote hian an match hnuhnung berah an mikhual Verona chu an inhnehtawkpui avangin pathumnaah an awm chhunzawm a, hmahruaitu Inter Milan chu point liin an pha lo mek. Table top 5 te hi an inthlauhna point a tam loh avangin Napoli-in chetsual nawn an duh dawn lo a, chak ngei tumin San Siro an pan ang.