R. Mala'n silver a hnek chhuak

9th Elite Men's & Women's National Boxing Championship-ah Services aiawha tel Malsawmtluanga'n light heavyweight (75-80kg) category-ah silver a hnek chhuak. Lunglei Electric Veng tlangval hi Inrinni final-ah Services hminga tel tho Ankush (Haryana) lakah a vanduai.

Mizo mipa zingah Senior National Boxing C'ship-ah gold medal la an la awm lo a, Mizo boxing legend Zoramthanga khan World Championship-ah bronze la mah se Senior National-ah gold a hnek chhuak lo. Mega Boxing 2025-a 70-75 kg cateogry-a champion R. Mala pawhin hlawhtlinna sang tak chang mah se a tum ram a thleng thei ta bik lo.

Greater Noida, Uttar Pradesh-a inelna neihah R. Mala hian first round leh last 16-ah a khingpui Madhya Pradesh leh Kerala boxer te chu a knockout a, quarterfinal leh semifinal-ah Maharashtra leh Chandigarh aiawhte chu unanimous decision-in a hneh ve ve bawk. Final-ah R. Mala a vanduai a, silver medal-ah a lungawi a ṭul.

Lunglei Electric Veng tlangval R. Mala chuan, "Ka kum a la naupang a, theihtawp ka chhuah ang a, Pathian zarah Mizo zinga gold la hmasa bertu nih hi ka tum," tiin Vanglaini a hrilh. International match khelh tur a neih avangin Mizorama haw loin vawiin hian Patiala-ah India camp a zawm ang.

R. Mala chuan sawi chhunzawmin, "Bul min ṭanpuitu coach Lalfakzuala leh hma ka sawn zel theih nana min puitu coach Ch.Lalmuanpuia chungah ka lawm hle. Kan veng Lunglei Electric Vengin min thlawp ṭha a, an chungah ka lawm takzet, LMC ward no VI councillor R.Lalremsiama chungah ka lawm hle bawk," a ti.

Mizo boxer hmabak nei êng zinga mi R. Mala hian kum 2022 khan Army Championship-ah gold lain best boxer-ah thlan a ni a, kum 2022 khan National Games (Gujarat)-ah silver lain, nikum khan Senior National Boxing Championship-ah Mizoram tan bronze a hnek chhuak. Tun ṭum inelnaah erawh Services tan khelin a thlensan avangin havildar-ah a kai sang ang.

9th Elite Men's & Women's National Boxing Championship-ah Mizoramin mipa boxer paruk leh hmeichhe boxer panga an tir a, medal hlawh chhuak an awm lo. Chutihrualin nikum kum tawpa MIZBA buatsaih Mega Boxing-in rah ṭha a thlen a, Mizo boxer-ten India rama lang turin theihna an nei tih a lang.