Record thar siamtu Mama

Mizo shuttler beiseiawm Malsawmhlua (Mama) chuan Yonex-Sunrise All India Junior Ranking Badminton Tournament 2026-ah silver medal lain kum bul a ṭan a, Serchhip P&E Veng rawlthar hi Mizo badminton player zinga nationel level Under 15, U17 leh U19-a final lut vek thei awmchhun a ni!

Hyderabad-a neih inelnaah Mama hi Aanayan Borah nen inkawpin, boy's doubles-ah an inlan a, final lut mah se, gold erawh an hlawh chhuak zo ta lo. Mama hi kum 16 leh thla li mi lek niin, U19 inelnaah kum khat a inlan tling ve chiah a, a sulhnu a nep lo hle.

January 3-10 inkar khan inelna hi neih niin, Mama leh a kawppuite hi seeded 5-na ni chungin an inlan a, an match hmasa berah Gauransh Gupta leh Eeshan Matharasan-te chu 21-17, 18-21, 21-19 a hnehin, round of 16 an lut zui.

Mama leh Aanayan ten last 16-ah 21-17, 21-16 in Sanidhya Sunil Ekade leh Abhinav Khandari te inkawp an hneh zui a, quarterfinal-ah seeded no 2 ni thei Divyansh Agrawal leh Amarjit Singh Khwairakpam te ṭangdun chu 25-23, 17-21, 21-16 in an hneh leh bawk.

Semifinal-ah pawh Mama te ṭhiandun hian anni aia seeded sang, no. 4-na Bjorn Jaison leh Showrya Kiran J. te inkawp chu 21-23, 21-11, 21-15 in an hneh leh a, an theihna sanzia an pholang.

Final-ah erawh seeded no. 1 Charan Ram Thippana leh Hari Krishna Veeram Reddy te inkawp chu an ngam lo a, uiawm taka 12-21, 21-23 a tlawmin, silver medal-ah lungawi an zir a ṭul ta a ni.

Badminton inelnaa junior category bikah Mama hi Mizo zinga national medal dawng thei palina a ni a, a hma hian C. Lalramsanga, Lalrempuii leh H. Lalṭhazuala ten an lo dawng tawh - December thla khan Mama hian U17 national championship-ah silver medal a lo dawng tawh bawk.

Mizoram Badminton Asso-ciation (MBA) chuan thuchhuah siamin, Malsawmhlua an lawmpui thu leh an chhuan thu an sawi a, "Hei aia sang zawk thleng chho zel thei turin duhsakna sang ber kan hlan," an ti.

Tun inelnaah hian Mama bakah Vanlalhruaia Sailo (Boys' singles), Zoramthari leh H. Lalrinhlui (Girls doubles) bakah H. Lalrinhlui leh a partner, state dang mite chuan qualifying round aṭanga bul ṭanin main draw an invaw kai a, Sainunmawia Sailo leh a partner ten main draw an lut bawk.