Chelsea tan ROSEnior par rim a tui

Club World Cup champion Chelsea boss thar Liam Rosenior-a'n Charlton Athletic an hmachhawn hmain press a hmachhawn a, "Mi chapo tak angin min ngai lo ula, mahse, ka hnathawhah hian ka ṭha ve tawk," a ti!

Rosenior-a insawithei satliah lo tih chu a takin hmuh tir zui kan ni a, Chelsea chuan Inrinni zan khan FA Cup third round-ah Charlton Athletic chu 5-1 ngawtin an sawp.

Blues tan Jorrel Hato, Tosin Adarabioyo, Marc Guiu, Pedro Neto leh Enzo Fernández (penalty) ten goal khat ṭheuh an khung a, mualneitu Charlton tana Miles Leaburn goal khung chu mualpho zualpui khuhna chauh a ni.

Chelsea-in nuamsain hnehna an chang a, Rosenior atan bul ṭan dan duhthusam a tling. Hetihrual hian buk lung khai nan erawh a la hma hret a, Charlton hi Championship club an nih bawk avangin Rosenior-a ṭhatna teh nan a tling tawk lo.

Team inthlau

Chelsea fan-ten coach thar nei mah se, an phur lo - tun hnaia club thuneitute hmalaknaah an lungawi lo a, Charlton khelmualah pawh fan-ten club neitu Blueco te duh lohna an au pui nasa hle.

Blueco hian sum hmang hnem mah se, team nghet tak din an la harsat rih - an squad hlut zawng hi pound tluklehdingawn khat chuang a ni a, an zingah £115mtd man Moises Caicedo pawh a tel.

Hetihlai hian an lenchilh Charlton erawh second division club an ni a, an club player man to ber record chu kum 2001-a £4.75mtd-a an lei Jason Euell-a'n a la chelh reng!

Hei ringawt pawh hian team pahnih inkar zauzia a hrilhfiah a, mahse, Blues-in an beisei ang goal an khung lawk thei bik lo - Chelsea fan-te "attack attack attack" tiin an au rual a, goal hmuh an duh.

A sur ta!

Chelsea fans thin a rim hman a, mahse, an thinrim zualpui beng daih nan, first half hun pek belhah Jorrel Hato chuan goal a khung - kum 19 mi defender tan Blues a pan hnua a goal khung hmasak ber a ni.

Blues-in 1-0 in chawlhlawk an hmang a, second half-ah chuan goal a sur a ni ber! Minute 50-naah Tosin chuan Facundo Buonanotte-a freekick aṭanga ball kal chu a tauh lut a, 2-0 a ni der.

Charlton an beidawng bik lo. Lloyd Jones leh Charlie Kelman ten an chance neih chhawr lo mah se, Leaburn chuan si phurh sut ṭhenna goal a khung a, 2-1 a ni. Mahse, mualneitu team phur chhung erawh a rei lo.

Kum 19 mi Guiu-a'n an goal thumna a khung a, Alejandro Garnacho, Enzo, Estevao Willian leh Liam Delap ten an chance hlah vek mah se, hun pek belhah bench aṭanga lut Pedro Neto-a'n a khung belh a, Enzo-a'n penalty hmangin chak a nemnghet zui.

Chelsea beiseina

Blues-in coach thar hnuaiah goal nga an khung nghal avangin an phur thar ang tih a chiang a, result duhthusam tia sawi hial tlak a ni - Nilaini zan dar 1:30-ah Arsenal an mikhual zui dawn a, Rosenior-a theihna tak tak a hriat ang.

English coach hian Premier League-a coach ngaihnawm tak tak Sir Alex Ferguson, Arsene Wenger, Jose Mourinho, Jurgen Klopp leh Pep Guardiola te anga sulhnu ropui a nei thei dawn em hriat ni lo mah se, a titi erawh a ngaihnawm nghal hle.

Rosenior hian inkhelh hmain, "Ka hnathawhna apiangah, coach lailawk, assistant emaw head coach emaw ang pawh ni se, ka hlawhtling zel," a ti! Kum 41 mi coach chuan, "Strasbourg ka enkawl tirh khan media chuan fiamthu ang lekin min chhuah.

"Ligue 1 mawngphaha kan awm tur thu an sawi a, player naupang leh tawnhriat nei tlem ka kawl a, tuma hriat loh English coach, min ti bawk. Mahse, a tawpah chuan point thum chiahin Champions League kan khel phak lo," a ti a, pawn lam thawm bengchhengin a tihbuai loh thu a sawi.