Liverpool-ah Szoboszlai cham dawn

Season duhawm tak hmangtu, Liverpool midfielder Dominik Szoboszlai chu Anfield-ah a cham dawn niin khawthlang media-te chuan an tarlang a, Hungary captain hian a thu phungin Reds-a cham a remti tawh niin an sawi.

Kum 25 mi midfielder hi midfield-ah chuan khawi laiah pawh a chhawr theih a, right back-ah pawh a talbuai chuang ngai lo. Tun season-ah Liverpool-in beisei phak lo mah se, ani erawh a langsar hle.

Hungarian midfielder hian tun season inelna hrang hrangah Reds tan match 27 khela goal nga khungin, assist vawi nga a nei tawh a, Liverpool tan player pawimawh a ni.

Szoboszlai hian kum 2028 thleng Liverpool-ah hian contract la nei mah se, tun season-a a chet ṭhat em avangin Real Madrid leh Bayern Munich ten an ngaihven nia sawi a ni a, Liverpool tan lung muang taka awm chi a ni lo.

Hei vang hian Reds hian a contract neih lai ang aia hlawh ṭha zawk pek tumin contract an zawrh ta a, chiang taka ziah fel la awm lo mah se, Anfield-ah a cham ngei dawn niin a lang.

Liverpool hian zanin dar 1:15-ah FA Cup third round an khel dawn a, Barnsley an mikhual ang - Reds hi League Cup aṭangin an tla tawh a, Premier League-ah champion a beiseiawm tawh lo bawk.

Hei vang hian English club tan FA Cup chu 'NIL' loa season hman an duh chuan, tlak thiang lo, tia sawi theih a ni a, Barnsley hi League One club an nih avangin harsatna nei loa paltlang mai tura ngaih an ni.

Hetihrual hian Liverpool hi hliam vangin an talbuai hle. Stefan Bajcetic leh nipui laia lakluh Giovanni Leoni te chu inhliam an kawl sa an ni a, centre back-ah chuan Virgil van Dijk leh Ibrahima Konate te chu inlan thei tura 'fit' an neih an ni a, Joe Gomez pawh a chhawr theih ang.

Pound maktaduai 125 man Alexander Isak leh Japanese midfielder Wataru Endo te pawh hliam vangin an chawl mek a, an league match hnuhnung bera Arsenal nena an inhnehtawkna inkhelah khan Conor Bradley chu hliam vanga lakchhuah a ngai bawk.

Coach Arne Slot nena inhmu thiam lo hman Mohamed Salah chu Africa Cup of Nations (AFCON) khelin a thangbo mek a, chuai lam pan tawh anga an sawi forward hian AFCON-ah goal li khung tawhin, Egypt chu semifinal a hruai thleng tawh.

Tun season-a goal 11 khung tawh Hugo Ekitike dinhmun chu sawi chian theih a la ni lo - dam pawh ni se, zaninah chuan hahdamtir a nih a rinawm mah zawk.