FA Cup aṭangin Spurs an tla

Thomas Frank-a enkawl Tottenham Hotspur-in Premier League pawn lamah pawh result an nei ṭha thei lo - Inrinni zan khan FA Cup third round-ah Aston Villa chu 2-1 in an hneh lo a, English football inelna ngaihhlut hlawh aṭangin petchhuah an ni leh ta.

Spurs khelmualah Villa-in first half chhungin goal hnih an khung hman a, Emiliano Buendia leh Morgan Rogers ten Villa tan goal an khung - Premier League-a pathumna ni mek Villa an chak awlsam dawn niin a lang hman.

Mahse, second half ṭan a nih hnuah Spurs inkhelin hma a sawn a, minute 54-naah Wilson Odobert chuan si phurh a sut ṭhen. London club-in khel ṭha zui mah se, chance hlauhawm siam an harsat a, a tawpah chuan a tlawm zawk an ni zui.

Spurs hi match li chhung inelna hrang hrangah a zawnin an chak zo ta lo a, Thomas Frank-a dinhmun ṭha lo sa a nghin belh. Hetihrual hian chanchin lawmawm lo dang an nei tel a, striker Richarlison chu hliam vangin lakchhuah a ngai.

He thu buatsaih a nih lai hian Richarlison dinhmun tur a la hriat loh a, Frank chuan match khelh tur an ngah lutuk chu player-ten an tuar nia a hriat thu a sawi.

Tottenham boss chuan, "Thuneituten fixture hi an thlir ṭhat a ngai a ni. Ni 13 chhungin match nga kan khel a, ni 10 chhungin match li kan khel hman," a ti a, match tam lutuk chu player-in an zawh loh thu a tarlang.