Reliance buatsaih football inelna zo hnai

Reliance Foundation Youth Sports (RFYS) Mizoram Football Championship 2025-26-ah inelna tam zawk zawh a ni tawh a, Aizawla khelh turah hmeichhe Under 15 inelna chauh khelh tur a awm tawh. Reliance hian Mizoramin football-a hma a sawn theih nan hma a la nasa a, inelna hrang hrang a buatsaih nasa hle.

Inelna hi Aizawl, Champhai, Kolasib leh Lungleiah te neih a ni a, Lunglei bikah hmeichhe inelna a awm lo. RFYS hian MFA nena thawk dunin inelna an buatsaih a, Mizoram tana an hnathawh hi a hlu takzet.

Mipa U15 leh U17 pual bik hian Inter District Championship neih an ni a, U15-ah Govt Rahsiveng MS 1, Lunglei an champion. Inelnaah hian Neuhof School, Chanmari (Aizawl), Holy Missions School (Champhai), Govt Kawnpui MS-I (Kolasib) leh Govt Rahsi Veng MS-I (Lunglei) te an tel a, vawi khat ṭheuh inkhelh kual hnuah Govt Rahsi Veng MS-I hian point ruk hmuin an champion.

U17 Boys-ah Aizawl FC (Aizawl), Lushai Corner FA (Aizawl), Corner Stone School (Champhai) leh Z&P Memorial FA (Lunglei) te an tel a, Aizawl FC hian point kua hmuin an champion. Inelna hi Ṭhuamluaia Mual, Lungleiah khelh a ni.