Magpies-in Cherries an pet chhuak

Newcastle United chuan FA Cup third round inkhelah Bournemouth an hmachhawn a, goal ruk ngawt a lut - team pahnih hi hun pangngaiah 3-3 in an inhnehtawk a, penalty hmanga chak zawk zawn a nih hnuah, 7-6 in Magpies an chak hram.

St James' Park-ah inkhel hmuhnawm chhawpsakin kan awm a, goal erawh second half aṭang chiahin kan hmu thung - minute 50-naah Harvey Barnes chuan goal hmahruai a khung a, tun season-a goal 10 a khungna chiah a ni.

Mahse, mikhual Bournemouth an hnual duh bik lo - Alex Scott leh David Brooks hmangin Magpies an chhanglet a, minute 70 tlin hmain, 2-0 in hma an hruai der.

Eddie Howe-a team-ten goal khung leh an harsat avangin Cherries hi an tlang mai dawn niin a lang tawh a, mahse, hun pek belhah beisei loh thil a thleng.

Cherries goalkeeper Djordje Petrovic-a'n Sandro Tonali titluin penalty a chawi a, boruak sang tak karah Anthony Gordon chuan goal-ah a chantir - extra time khelh zui a ngaih phah.

Minute 118-naah Barnes bawkin Newcastle tan khung lehin, chakpui ngei tura ngaih ni tawh mah se, Bournemouth-in hun pek belhah si phurh an sut ve leh ta thung - hun pek belh minute hnihnaah bench aṭanga luhtir Tavernier chuan si phurh a sut a, penalty pet a ṭul.

Arsenal keeper hlui, Newcastle second choice ni ta Aaron Ramsdale-a'n Evanilson, Alex Jimenez leh Bafode Diakite te pet dansakin Magpies a chakpui a, 7-6 in hnehna hlado an chham.