Pathumnaah AS Roma an chho

Serie A-ah AS Roma chuan Inrinni zan khan an mikhual Sassuolo chu 2-0 in an hneh. Roma tan Manu Kone leh Matias Soule ten goal an khung a, table-ah pathumnaah chhoin an chungah Milan club pahnih Inter Milan leh AC Milan te chauh an awm.

Stadio Olimpico-a inkhelah hian team pahnihte an inhnehtawk a, chance hlauhawm inneih chhawk mah se goal hmaah an hriam tawk loh avangin an inhnehtawk mai dawnin a lang hman.

Minute 76-naah Matias Soule cross ball chu Manu Kone chuan an hmahruaina goal atan a tauh lut. Minute thum hnu lawkah goal assist tu Soule chuan an goal hnihna a khung a, hun tawp zuiin Roma 2-0 in an chak.

Roma hian an chung chiaha awm Napoli chu lehpel mah se nizan inkhela Napoli result a zirin an dinhmun hi a la danglam thei. Napoli hian Inter Milan chu an khelmualah an va tlawh.

Inkhel dangah Atalanta chuan an striker chhuanvawr Ademola Lookman AFCON a khelh vangin awm lo mah se goal khung kawngah harsatna an tawk lo a, an mikhual Torino chu 2-0 in an hneh.

Belgian forward Charles Di Ketealere chuan Atalanta tan minute 13-naah hmahruaina goal khungin, Mario Pasalic chuan injury time-ah an chak nem nghehna goal a khung bawk.

Atalanta hian an chung chiah awm Como chu khel tam zawk ni chungin point thumin an phak lo a, Cesc Fabregas-a enkawl Como hian Inrinni zan vek khan an mikhual Bologna chu 1-1 in an inhnehtawkpui a ni.