NorthEast champion Mizoram University

NorthEast Inter University Football Tournament 2025-26-ah Mizoram University chuan an khingpui hneh vekin an champion a, All India Inter University Football Tournament khel turin an tling. K. Lalthlamuana leh Ari Benjamin LR Hmar te kaihhruai team hian inelna an thunun a, champion turin Pathianni khan match hnuhnung berah Dibrugarh University chu 3-1 in an hneh.

Inelna hi The Assam Royal Global University, Guwahati-ah January 5-11, 2026 chhung khan khelh a ni a, Mizoram hian group stage-ah Bodoland University (13-0) leh ICFAI, Meghalaya (8-2) te an sawp hnuah champion lai National Sports Univ, Manipur chu 2-1 in an hneh.

Group tina pakhatna Dhanamanjuri University (Manipur), Nagaland University leh Dibrugarh University ten champion zawngin an inkhel kual a, Mizoram hian an khingpui an hneh vek. January 10, Inrinni khan match hnih neiin Dhanamanjuri University 2-1 a an hneh hnuin Nagaland University 3-1 in an hneh a, champion nemngheh nan Dibrugarh Univ hi 3-1 in an hneh leh bawk.

All India University hi January 30 - February 8, 2026 hian Kolkata-ah khelh tur a ni a, Mizoram champion hnuhnung ber chu kum 2008 daih tawh kha niin Ari Benjamin-a kaihhruaina hnuaiah an champion. Kum 2014 khan Mizoram hi pahnihna an ni a, kum 2009, 2010, 2011, 2015 leh 2017 khan quarterfinal thlengin tun ṭum hi kum 2017 hnua Mizoram University-in All India University khel tura an inpetlin lehna hmasa ber a ni.