City khingpui tur champion lai Newcastle

League Cup semifinal khelh ṭan a ni dawn. Zanin dar 1:30 hian champion lai Newcastle United-in tun hnai kum 10 chhunga record nei ṭha ber Manchester City an mikhual dawn. Semifinal hnuhnung zawkah Chelsea leh Arsenal te an inkhel dawn a, London Derby hi January 14, Nilaini zanah an khel thung ang.

League Cup semifinal hi double leg-a khelh ṭhin a ni a, second leg hi February thla tira khelh tur a ni. Final hi Wembley Stadium-ah March thlaah khelh a ni thung ang.

Semifinal kalkawng

Man City leh Newcaslte United te hian third round aṭangin an khel ṭan. Magpies hian Bradford City 4-1 a sawpin bul an ṭan a, Tottenham Hotspur 2-0 in an hneh leh bawk. Quarterfinal-ah Premier League club tho Fulham an hmachhawn a, 2-1 in an hneh hram.

Pep Guardiola hote hian Huddersfield Town 3-0 in an hneh a, Swansea 3-1 a hneh lehin Brenford lakah 2-0 in an chak. Man City hian team langsar an la hmachhawn lo a, Newcastle hi fiahna hmasa berah a ngaih theih.

A hmuhnawm dawn

Newcaslte hian kum 70 chhung nomawi lian tham an chawi loh hnuah season liam ta khan Liverpool 2-1 a hnehin League Cup-ah an champion. Alexander Isak leh Dan Burn ten goal an khung a, Isak hi Reds-in an chhuhsak tawh. Chutihrualin Isak thlakna tura an lakluh German striker Nick Woltemade a rintlak hle.

Woltemade hian tun season-ah goal kua a khung tawh a, League Cup bikah erawh goal khat chauh la khungin goal hnih khungtu Joelinton leh William Osula te amah aiin an khung tam zawk. Semifinal hi double leg-a khelh tur a nih avangin Eddie Howe-a'n an muala result ṭha neih a duh ang.

Magpies hian kartawp khan FA Cup-ah Bournemouth penalty shootout hmangin an hneh hram a, chutihrualin hun pangngaiah goal thum an khung. Harvey Barnes-a'n goal hnih a khung bakah Anthony Gordon-a'n goal pawimawh a khung a, City lakah pawh player pahnih hi an pawimawh dawn.

Man City-in an khingpui a zawna vawi thum an draw hnuah Exeter City 10-1 in an sawp a, goal khung khawl Erling Haaland-a'n goal a khung lo zawk. Player thar Anotine Semenyo-a'n assist leh goal neiin man of the match-a thlan a ni a, tun dinhmun a thlen theihna chhan Cherries hnehtu Magpies laka phuba lak hi a duhthusam a ni ang.

Pep Guardiola-a'n FA Cup third round-ah team nem an hmachhawn chungin player ṭha pangngai a luhtir a, kartawpah Manchester United khelmual Old Trafford tlawh dawn mah se Magpies laka player ṭha a luhtir a nih pawhin thilmak a ni lo ang.