Remsiami goal a tawk lo

India rama hmeichhe hockey league ngaihven hlawh tak, Women’s Hockey India League-ah Lalremsiami khelhna Rarh Bengal Tigers chuan final lut mah se, Delhi SG Pipers nen 1-1 a an inhnehtawk hnuin, penalty-ah Remsiami te an vanduai.

Jaipal Singh Stadium, Ranchi-a inkhelah Bengal Tigers hian Remsiami hmangin goal hmahruai an khung hial a, mahse, Delhi-in Preeti Dubey hmangin an chhanglet.

Hun pangngaiah goal dang a luh loh avangin, shootout hmanga chak zawk zawn a ni a, Bengal tan Remsiami leh Sukhveer Kaur te chauhin khung theiin, 3-2 in a tlawm zawkah an ṭang ta a ni.

Women’s Hockey India League-ah hian team pali awmin, vawi hnih ṭheuh an inkhelh kual hnuah a sang pahnihin final hi an khel - he inelnaah hian Mizo nula pathum an inlan.

Final-a chak zo ta lo Bengal Tigers tan hian Kolasib nula Remsiami bakah Hnahthial nula PC Lalrinpuii te an khel a, Ranchi Royals tan Kanghmun South nula Lalthantluangi a inlan bawk.