England-a kir hreh lo Gallagher

Atletico Madrid midfielder Conor Gallagher chuan Premier League-a kir a hreh lo niin an sawi a, England international hi Manchester United nena sawizawm a nih hnuah Aston Villa leh Tottenham Hotspur te hming a ri ve leh ta.

Gallagher hian August 2024 khan Atletico hi a zawm a, khatihlaia Chelsea coach thar Enzo Maresca chuan English midfielder hi a hnuaiah bul ṭantu regular a nih loh tur thu a hrilh.

Kum 25 mi midfielder hian a season khatnaah hmun pawimawh a chang nghal a, inelna hrang hrangah match 50 khela goal li khungin, assist vawi ruk a nei nghal.

Gallagher hian tun season-ah pawh match 27 ngawt khel tawh mah se, heng zinga match 18-ah hian bench aṭanga luhtir a ni a, vawi riat lakchhuah a ni bawk - goal thum khungin, assist vawi khat a nei.

World Cup-a England jersey hak duh Gallagher-a'n inkhelh tam a duh a, a beisei ang hi Atletico-ah chuan a hmu dawn lo niin a lang - hetiang boruak karah United, Spurs leh Villa an lo lang.

Atletico hian an player hi loan-a chhuahtir tumna erawh an nei lo a, an chhuahtir dawn a nih chuan hralh ngei an duh. Villa hian kar khat vel chu indawrna an kalpui tawh nia sawi a ni a, Spurs-in bul an ṭan mek bawk.

Diego Simeone enkawl Atletico hian tun season-ah beisei an phak lo. Spanish Super Cup semifinal-ah Real hneh loin an tla a, La Liga-ah palina ni mekin, hmahruaitu Barcelona chu match 19 khelh tawhah point 11 ngawtin an phak lo mek.

Hetiang boruak karah, zanin dar 1:30 hian Copa del Rey round of 16 an khel dawn a, Spanish second division club Deportivo La Coruna an lenchilh ang.

Spanish club lian zingah champion lai Barcelona leh Real Madrid erawh Spanish Super Cup final an khel chau a, Nilaini zanah Copa del Rey khel tur hian an inlan ve dawn chauh a ni.