McTominay hoin Napoli-in Inter an chelh

Pathianni zan Serie A inkhelah hmahruaitu Inter Milan chuan an mikhual Napoli chu 2-2 in an inhnehtawkpui a, table-ah pakhatnaah awm chhunzawm mah se an hmelma club pakhat zawk AC Milan nena an inthlauhna tihzau theihna hun ṭha an bawhpelh. AC Milan chuan table mawng lama awm Fiorentina chu an mualah 1-1 in an inhnetawkpui ve thung.

San Siro-a inkhelah team pahninhte an intumtawk a, minute kuana lekah Federico Di Marco chuan Marcus Thuram ball pek chu an hmahruaina goal atan a chhuih lut. Goal an chhuah hnuah Napoli an insiamṭha a, goal an khung ve nghal. Minute 26-naah Eljif Elmas ball cross chu Scott McTominay chuan hnai takah pet goal-in an si phurh a sut.

Team pahnihten inkhel hmuhnawm tak lantir mah se goal hmaah an hriam tawk lo. Inter tan tun season-a goal 10 khung tawh Lautaro Martinez hlauhawm thei meuh lo. Napoli tan Manchester United aṭanga an hawh Rasmus Hojlund hlauhawm viau mah se goal a keng tel lo.

Minute 73-naah Inter midfielder Henrikh Mkhitaryan chu Napoli defender Amir Rrahmani-a'n a rah avangin referee-in replay a ennawn hnuah penalty a pe. Hakan Calhanoglu lo pen chhuakin Inter hmahruaina goal atan a chhuih lut. Turkish midfielder Calhanoglu hian tun season-ah goal sarih a khung tawh.

Inter an chak mai dawna a lan laiin Scott McTominay bawk a rawn inlar leh a, minute 81-naah Scottish midfielder hian Noa Lang ball cross chu laklawh nei miah loin a pet lut a, an si phurh a sut nawn. Man United midfielder hlui McTominay hian tun season-ah goal nga a khungna chiah a ni.

Team pahnihten chakna goal khung tumin innawr chhunzawm mah se goal an khung loh avangin 2-2 in inkhel a tawp a, point khatah an lungawi a ṭul. Napoli erawh point hmuh zat inangah Roma aia an goal difference a ṭhat zawk avangin pathumnaah an chho leh.

Inter Milan-in point 43 hmuin table hmahruaitu an nih chhunzawm zel a, an hnuai chiaha awm Milan club pakhat zawk AC Milan nen point thumin an inthlau mek.

Pathianni zan vek khan AC Milan hian Fiorentina chu an tlawh a, Artemio Franchi Stadium-a inkhelah hian mualneitu tan Pietro Comuzzo chuan minute 66-naah hmahruaina goal a khungin a team te a chakpui dawnin a lang hman. Mikhual tean tan minute 90-naah Christopher Nkunku chuan an si phurh a sut a, 1-1 in inkhel a tawp a, Milan an him hram.