India-in New Zealand an hneh

India leh New Zealand chuan ODI match thum an khelh tura hmasa ber chu Pathianni khan Kotambi-ah an khel ṭan a, Men in Blue hian wicket liin hnehna an chang. Captain Shubman Gill-a'n vawm hmasak a thlang a, New Zealand-in 300 runs siam mah se over 49-ah 306 runs siamin India an chak.

Black Caps-in bul an ṭan ṭha a, opener Devon Conway (56) leh Henry Nicholls (62) ten half century an siam ve ve a, Daryl Mitchell-a'n 84 runs a siam bawk. Mikhual team hian over 50-ah wicket riat hloh mah se 300 runs an siam avangin chak thei dinhunah an ding.

Chutihrualin T20 awm hnuah erawh ODI-ah 300 runs hi chu target harsa a ni tawh lo a, chetsual theihna erawh a ni tho. Opener Rohit Sharma-a'n 26 runs siamin Shubman Gill-a'n 56 runs a siam a, Virat Kohli a langsar ta ber.

Ball 91 lekah Kohli hian 93 runs a siam a, century siam lo mah se India-in hnehna an channa kawngah a pawimawh. KL Rahul (29*) leh Washington Sundar (7*) ten a tawp an khar a, over 49-ah 306/6 runs siamin India-in wicket liin hnehna an chang.

India leh New Zealand te hian January 14, Nilaini tlai dar 1:30 hian Saurashtra Cricket Association Stadium, Rajkot-ah match hnihna an khel ang a, match tawp ber hi Holkar Stadium, Indore-ah January 18, Pathianni hian an khel thung ang.