Wimbeldon finalist hlui Raonic a chawl

Wimbledon finalist hlui Milos Raonic chuan Pathianni khan tennis khelh a chawlhsan thu a puang a, tennis-a a duhthusam angte a tihhlawhtlin theih avangin 'mi vannei ber' a nih thu a dawi tel bawk.

Kum 35 mi Canadian player hian kum 2016 khan Roger Federer hnehin Wimbledon final a lut a, final-ah Great Britain tennis star Andy Murray lakah tlawm thung. Raonic hian tour-level title pariat a la a, kum 2016 vek khan khawvela tennis thiam ber pathumna (world ranking no. 3) a ni pha a, Australian Open-ah pawh semi-final a lo lut tawh bawk.

Pathianni khan Raonic chuan social media-ah, "A hun a lo thleng ta, tennis ka chawlhsan dawn ta e. He hun hi engtik niah emaw chuan a la thleng dawn tih hriat lawk sa ni mah se, inpeih taka awm a har khawp mai. Tun hi ka inpeih theih tawp a ni tawh e. Tennis hi ka dam chhung zawng deuh thawa ka atchilh leh ka hmangaih ber a ni," a ti.

A serve nat theih em avangin Raonic hi 'Missile' tia hming lem pek a ni a, a inkhelh hnuhnung ber chu 2024 Olympics daih tawh kha niin Germany player Dominik Koepfer lakah a tlawm. Raonic chuan, "Ka mumangte tihhlawhtling thei tura mi vannei ber ka ni hi ka lawm hle. Kum riat mi ka nih laiin tennis hi ka hmelhriat ṭan a, ka eizawnna a ni zui ta hial hi ropui ka ti hle," tiin a sawi.

Raonic hi Titograd, Yugoslavia (tunah chuan Podgorica, Montenegro)-ah a piang a, kum thum a nihin Canada-ah an pem. ATP title hmasa ber chu kum 2011 khan Pacific Coast Championships-ah a la a, Grand Slam nomawi chawi lo mah se Wimbledon-a final a thlen bakah Australian Open-ah semifinal a thleng a, French Open-ah quarterfinal a thleng bawk.