Man United enkawl tura rinkai ber Carrick

Manchester United enkawl lailawk tura rinkai ber chu Michael Carrick a ni a, club thuneitute chuan Nilainia player-ten training an neih hunah tihfel hman an tum.

Club enkawltu chungchangah thutlukna siam la ni lo mah se kum 44 mi Carrick leh United thuneitute hi thui takin an inbe tawh. Kum 2021-a Ole Gunnar Solskjaer an ban khan Carrick hian match thum enkawlin vawi hnih chakin vawi khat an inhnehtawk.

Carrick hian result nei ṭha mah se club lamin manager lailawk turin Ralf Rangnick an ruat ta thung. Inrinni khan United hian Solskjaer pawh an bia a, Norwegian manager pawh hi let leh thei tawh tura sawi ni mah se an ban tawh hnu a nih avangin thutlukna fuh ber a ni lo thei bawk.

January 5, Thawhṭanni khan Man United-in Ruben Amorim an ban a, Portuguese manager hian thla 14 chauh a enkawl hman. Manager lailawk tura ruat Darren Fletcher-a'n match hnih enkawlin relegation zone-a awm Burnley nen an inhnehtawk bakah FA Cup third round-a Brighton an hneh loh avangin Scottish manager tan senior team enkawl zel a rem tawh lo ang.

England midfielder hlui Carrick hian Tottenham Hotspur aṭangin Man United-in Sir Alex Fergusion-a'n kum 2006 khan a lalut a, kum 2018 thlengin khelin inelna hrang hrangah match 464 a khel hman. Man United-a manager lailawk hna a chelh hnuin Championship club Middlesbrough-ah manager hna a thawk a, kum hnih leh a chanve a enkawl hnuin nikum June thla khan result ṭhat tawk loh avangin an ban.

Carrick hian Boro hi 2022-23 season khan Championship play-offs thleng a hruai a, mahse semi-final-ah Coventry lakah an vanduai. Hemi hnu hian season zawnin a sangin paruka an tel phak loh avangin a hna hi a chan phah.

Wallsend-a piang Carrick hian Solskjaer aiin manager lamah tawnhriat a ngah lo zawk a, chutihrualin Man United bikah a tawp khar dan a ṭha zawk thung. Carrick hian 2017-18 season zawh khan inkhelh a chawlhsan a, Jose Mourinho-a hnuaiah United coaching staff zawm nghalin Portuguese midfielder an ban hnuah pawh Solskjaer hnuaiah match 168 chhung first team coach zingah a tel a ni.