Goal riat khungtu Bayern an sang zel

Pathianni zan Bundesliga inkhelah table hmahruaitu Bayern Munich chuan an mikhual Wolfsburg chu 8-1 in an sawp a, hmahruaitu an nih chhunzawm zel.

Allianz Arena-a inkhelah ṭan aṭangin mualneitu Bayern-in an nawr nghal a, minute ngana lekah Michael Olise ball cross chu Wolfsburg defender Kilian Fischer-an an lamah a tilut palh a, Bayern-in hma an hruai der.

Goal an khung hnuah bayern an muthlu zeuh a, minute 13-naah Wolfsburg tan Dzenan Pejcinovic chuan goal ṭha tak khungin an si phurh a sut.

Minute 30-naah Luis Diaz chuan an hmahruaina goal a tauh lut a, Diaz-an goal a thun theih nan Michael Olise a ṭangkai hle. Goal dang lut zui loin 2-1 in halftime hman a ni.

Inkhel inhnehtawk angin lang hman mah se second half-ah Bayern an chungnung tluan. Minute 50-naah Michael Olise chuan goal mawi tak khungin a team te hmahruaina a belhchhah a, Wolfsburg an tho tawh lo.

Wolfsburg defender Moritz Jenz chuan Luis Diaz goal khung tur dan a tumna lamah an lamah pet lut. Bavarians hian minute 68-na leh 69-naah Raphael Guerreiro leh Harry Kane ten an khung ve leh a, minute 76-naah Olise-a'n a mimala goal hnihna leh team goal sarihna a khung .

Minute 88-naah midfielder Leon Goretzka chuan khung ve lehin nuamsa takin Bayern 8-1 in an chak. Bavarians hian table-ah point 44 hmuin hmahruaitu an nih chhunzawm a, anmahni hnaih bertu Borussia Dortmund aiin point 11-in an sang zawk. Dortmund hian kar liam ta Zirtawpni khan Eintrancht Frankfurt nen 3-3 in an inhnehtawk a, point hnih an hloh. Zanin dar 1:00 hian Niko Kovac-a hote hian Werder Bremen an mikhual ang.