Mizo nula Grace-i telna Gokulam Kerala an champion
Hero Indian Women’s League 2019-20-ah Salem Veng nula Grace Lalrampari telna Gokulam Kerala chuan nimin final-ah KRYHPSA chu 3-2 a hnehin an champion.
India hmeichhe club inelna sang ber hi a season lina chiah a ni a, Gokulam Kerala hma hian Eastern Sporting Union (2017), Rising Student Club (2018) leh Sethu, Madurai (2019) te an champion tawh a ni.
Kumin Women’s League hi January 19aṭang khan Karnataka-ah khelh ṭan a ni a, team 12 chu group hnihah
ṭhen hran an ni.
Group A-ah KRYPHSA, Sethu Madurai, Kickstart FC Karnataka, FC Kolhapur City, Baroda Football Academy leh BBK DAV Football Club te awmin KRYPHSA leh Sethu Madurai ten semifinal an lut.
Group B-ah Gokulam Kerala, Kenkre FC, Odisha Police, Sreebhumi FC, Bangalore United leh Bidesh XI Sports Club te awmin Gokulam leh Kenkre ten knockout stage an lut.
Semifinal-ah KRYPHSA-in Kenkre 3-1 in an sawp a, Gokulam-in 3-0 in Sethu Madurai an sawp ve bawk.
Final-a inhmachhawn KRYPHSA leh Gokulam Kerala ten final thleng turin match ruk an khel a, an chak vek avangin ‘Dream Final’ a tih theih.
Karnataka State Football Stadium-a final hmuhnawm takah Irom Prameshwori Devi (2’) leh Yumnam Kamala Devi (25’) te hmangin Gokulam-in goal an khung hmasa a, Dangmei Grace (34’) leh Nongmaithem Ratanbala Devi (73’) te hmangin KRYPHSA-in si phurh an sut.
Salem Veng nula Grace-i’n chakna goal khungna hun ṭha a nei a, goal-ah ṭha takin pet mah se keeper Sowmya-i’na dang
Gokulam-in hnehna an chang tho a, Manisha siam sak chu Sabitra Bhandari-i’n minute 87-naah chakna goal khung nan a hmang. Emerging player nominee pathum zingah Grace-i a tel a, amaherawhchu chakna goal siamsaktu Manisha an thlang ta zawk.
Mizo nula Grace-i chuan, “Women’s League champion zinga tel chu ka lawm hle. Thil tam tak ka zir a, Mizoram hmeichhe football nen chuan a la inthlau khawp mai. India ram inelna sanga lang pha tur chuan kawng hrang hrangah hmasawn kan la mamawh a ni,” tiin Vang-laini a hrilh.
Grace-i hian tun inelnaah goal hnih a khung a, Mizoram football-a hmeichhe footballer ṭha bera chhal theih hi India ram football-ah ‘ber’ a la kai pha lo. Chutihrualin Grace-i hi player pawimawh a ni a, match sarih an khelhah semifinal an luh tawh vanga an hahdamtir tih loh chu bul a ṭan vek.