Alonso thlakna Arbeloa

Real Madrid hian Xabi Alonso nen an inṭhen thu an puan aṭanga minute rei loteah a thlakna atan Alvaro Arbeloa an lakluh thu an puang. Spain leh Real full-back hlui hi Real B team enkawltu a ni mek.

Liverpool tan pawha khel tawh Arbeloa hian kum 2020 aṭangin Real youth team hi a enkawl ṭan a, senior team-ah erawh sulhnu a nei lo. Real Madrid hian zanin dar 1:30 hian Copa del Rey last 16-ah Albacete an tlawh dawn a, Arbeloa hian a enkawl ṭan nghal dawn.

Copa del Rey-ah hian last 16 lut turin Real hian CF Talavera de la Reina chu 3-2 in an hneh hram a, Spanish third division club laka an khelh dan thlir chuan second division club Albacete lakah fimkhur a ṭul ang.

Arbeloa hian Real Madrid tan kum 2009 leh 2016 chhung khan a khel a, nomawi pariat Champions League (2), Club World Cup (1), UEFA Super Cup (1), La Liga (1), Copa del Rey (2) leh leh Spanish Super Cup (1) te chawipui. Spain tan match 56 khelin 2010 World Cup an champion bakah kum 2008 leh 2012-a Euro C'ship an champion ṭumin a tel bawk.

Coaching lamah kum 2020 aṭangin a lut a, 2020-21 season khan Under 14 team a champion pui. Arbeloa hian 2021-22 season-ah Under 16 a enkawl a, kum 2022 aṭanga 2025 thleng Under 19 team enkawlin nikum aṭang khan Real B team a enkawl ṭan. Under 19 team a enkawl lai hian league, Copa del Rey leh Champions Cup-ah te a champion pui vek.

Mahse, player naupang rual leh star player rual enkawl a harsa dawn. Chutihrualin Arbeloa hian Alonso kalphung ang ni loin Carlo Ancelotti kalphung angin team a enkawl dawn nia sawi a ni.