Liverpool-in goal li an khung

Real Madrid, Manchester United leh Chelsea ten an manager an ban a, Liverpool manager Arne Slot erawhin ban a tawk rih dawn lo. Reds hian Thawhṭanni zan khan FA Cup third round-ah Barnsley 4-1 in an sawp a, fourth round-ah Brighton & Hove Albion an hmachhawn ang.

Anfield-a inkhelah Reds tan Dominik Szoboszlai, Jeremie Frimpong, Florian Wirtz leh Hugo Ekitike ten goal khat ṭheuh an khung. Liverpool hian January 17, Inrinni zan dar 8:30 hian Premier League-ah relegation zone-a awm Burnley an hmachhawn dawn a, Slot-a hote tan kawng dik zawh chhunzawm theihna hun ṭha a ni ang.

Ṭha ber dawttu

Liverpool manager Arne Slot-a'n FA Cup fourth round-a a khingpui Barnsely dinhmun a hria a, League One club lakah team ṭha ber a luhtir lo. Arsenal nen an inhnehtawk ṭum aṭangin player paruk ngawt a thlak.

Inhliam vang Conor Bradley a khel dawn tawh lo a; Alisson, Ibrahima Konate, Kerkez, Ryan Gravenberch leh Florian Wirtz te bench-ah awmin bul ṭantu zingah Giorgi Mamardashvili, Andrew Robertson, Joe Gomez, Curtis Jones, Rio Ngumoha leh Federico Chiesa te an tel thung. Chutihrualin team innghahna Virgil van Dijk, Jeremie Frimpong, Alexis Mac Allister, Dominik Szoboszlai leh Cody Gakpo ten bul ṭantu zingah an tel tho.

Goal ropui

Anfield-ah Barnsley-in Liverpool an rum ṭhaih hmasa a, goal ban an tauh per. Mahse, minute kuana lakah Dominik Szoboszlai-a'n goal ropui a khung a, box pawn aṭangin goal kilah tak a pet lut.

Barnsley lamin goal chhuah hma mah se an nawr chhunzawm ngam a, keeper Mamardashvili tan hna an siamsak. Mahse, goal ropui dang phochhuah nawn a ni. Minute 36-naah Jeremie Frimpong-a'n mual dinglam aṭanga lalutin goal ṭha bik a khung.

Goal ropui khungtu Szoboszlai-a'n a khingpuite a dah sang lo tih a lang a, anmahni box chhungah khalh lutin six yard box-ah kheng a tum a, a kheng sual. Minute 40-naah Adam Phillips-a'n goal ruaka ngaih theihah chiang zetin goal a khung.

Barnsley manager Conor Hourihane pawhin Szoboslai chet dan chu inzah lohna tiin inkhelh banah a sawi a, Slot pawhin mak a tih thu a sawi bawk. Mahse, Szoboszlai hi player hmuhnawm ber zinga mi a ni a, tisual mah se a khel tluan.

Wirtz leh Ekitike

Liverpool-in AFCON vangin Mohamed Salah an chhawr thei lo a, hliam vangin Alexander Isak an hmang thei lo bawk. Mahse, third division club lakah goal khung kawngah harsatna an tawk lo. Second half-ah Virgil van Dijk-a'n crossbar a volley per a, goal hnih dang a lut bawk.

Bench aṭanga lut Florian Wirtz leh Hugo Ekitike ten danglamna an thlen. Minute 84-naah Wirtz hian Ekitike siam sak chu goal kilah mawi zetin a khung a, German midfieder class sanzia hmuhin a awm.

Injury time-ah Wirtz hi a siamtu zawkah a ṭang ve thung a, Ekitike-a'n ama pualin goal a khung. Premier League champion la Liverpool 4-1 in an chak a, league lamah an nomawi an hum thei lo a nih pawhin FA Cup-ah nomawi beiseina n chhi nung zel.