Serie A: Goal nga khungtu Juventus an sang

Thawhṭanni zan Serie A inkhelah Juventus chuan Cremonese 5-0 in an sawp a, table-ah pathumnaah an chho. Turin club tan Gleison Bremer, Jonthan David, Kenan Yildiz leh Weston McKennie ten goal khat ṭheuh an khung a, Cremonese player Filippo Terracciano-a'n an lamah a tilut bawk.

Allianz Stadium-a inkhelah mualneitu team an chungnung zawk a, minute 12-na lekah Gleison Bremer chuan Fabio Mirettti shot lo tauh kawiin an hmahruaina goal a khung. Minute thum hnu lawkah Canadian forward Jonathan David chuan a khung belh ve leh a, minute 35-naah Turkish midfielder Kenan Yildiz-a'n penalty hlah mah se goalkeeper dan per chu goal-ah a chantir ta tho. Halftime-ah 3-0 in Juventus-in hma an hruai.

Turin club bawkin second half an thunun a, minute 48-naah Weston McKennie ball pet chu Cremonese defender Filippo Terracciano chuan an lamah a tilut palh. Minute 64-naah McKennie bawk inlarin, American midfielder hian Pierre Kalulu ball cross chu ṭha takin a tauh lut. Goal dang lut tawh loin Juventus nuamsa takin 5-0 in an chak.

Juventus hi table-ah pangana aṭangin pathumnaah an chho a, an hnuaia awm Napoli leh Roma nen an point hmuh zat inang mah se an goal difference a ṭhat zawk avangin pathumnaah an awm. An chungah hian Milan club pahnih Inter Milan leh AC Milan chiah an awm a ni. Amaherawhchu, zanin Napoli inkhel result a zirin an dinhmun hi a danglam leh thei a, Napoli hian Parma an lo mikhual dawn a ni.

Zaninah Serie A inkhel turah champion beiseiawm zinga mi Inter Milan, AC Milan leh Napoli te an inlan dawn. Hmahruaitu Inter-in Leece an mikhual dawn a, Napoli chuan Parma an lo mikhual ve dawn. Milan club pakhat zawk AC Milan chuan January 15, Ningani zan dar 1:15-ah Cesc Fabregas-a enkawl Como an tlawh thung ang.