French Cup aṭangin PSG an tla

PSG-in season liam ta khan France ram chhunga champion theihna zawng zawngah an champion a, kuminah erawh beisei an pha lo. French Cup champion lai PSG hian round of 32-ah an ṭhenawm Paris FC lakah 1-0 in an tlawm. Luis Enrique hote hian kar liam ta khan Ligue 1-ah Paris FC hi hneh mah se French Cup-ah an ngam lo thung.

Parc des Princes-a inkhelah mualneitu PSG chu a tir aṭangin an hlauhawm nghal a, chance hlauhawm pawh an nei nghal nual mah se an vanneih zan a ni lo. Enrique hote hian 70% ball an chang a, goal shot pawh vawi 25 zet nei mah se goal an khung thei lo.

Khvicha Kvaratskhelia leh Bradley Barcola ten chance ṭha an hlah hniam a, Paris FC keeper Obed Nkambadio a che ṭha ve bawk. Paris FC forward Jonathan Ikone chuan minute 74-naah goal awmchhun a khung a, PSG-in si phurh an sut thei lo. Enrique hoten goal an khung theih loh avangin French Cup an mangṭha. PSG leh Paris FC hi Paris club ve ve an nih piah lamah an stadium inkarah 15m chauh a awm a, European champion PSG tan ṭhenawm club hneh loh hi pawm thiam a har ang.

Spanish manager chuan, "Kan khel ṭha takzet a, chance pawh an ngah. Mahse, football-ah chuan goal a pawimawh ber a, goal an khung laiin kan khung ve lo. Result vangin kan rilru a na a, kan pawm mai erawh a ṭul si," tiin inkhel chungchang a sawi a, an result ni loin an khelh danah a lungawi thu a sawi tel bawk.