Zaninah hmahruaitu Bayern an inlan dawn

Bundesliga hmahruaitu Bayern Munich chuan zanin dar 1:00 hian FC Cologne nen an inhmachhawn dawn. Vincent Kompany hoten kumina an match hmasa berah Wolfsburg 8-1 in an sawp a, league table-ah poin 44 hmuin pakhatna an ni.

Bavarians hian match 16 khelh tawhah goal khung hnem ber (63) niin goal chhuah tlem ber (12) an ni a, German football an thunun hle. England captain Harry Kane-a'n league-ah ringawt goal 20 a khung tawh a, Cologne tan Kane ringawt pawh hi ven tham a ni ang.

Tlarhma lamah Kane thlawp turin French winger Michael Olise leh Colombian winger Luis Diaz te an awm dawn a, Bayern trio aia che ṭha hi European club zingah an awm chuang lo. Kane, Olise leh Diaz te bakah rawlthar duhawm Lennart Karl a awm dawn bawk a, Karl hi en bik a sual lo ang.

Nikum kum tawpa inhliam veteran goalkeeper Manuel Neuer pawh a dam leh tawh a, Wolfsburg lakah inlan leh tawhin tlarhnung a phui phah sawt. Neuer-a hmaah Jonathan Tah leh Dayot Upamecano te an inkawp leh tura ngaih an ni a, Joshua Kimmich leh Alphonso Davies te an inlan a beiseiawm loh thung. Kimmich hian mimalin training nei leh tawh mah se a la inlan hmel loh avangin Konrad Laimer leh Japanese defender Hiroki Ito te chu tlarhnung sirah an awm a rinawm.