Semenyo goal an pawm lo; VAR-in a tisual em?

Manchester City-in Newcastle United 2-0 in an hneh a, player thar Antoine Semenyo hnihna khung pawm a ni loh avangin sawi zui a hlawh hle. Minute 63-naah Tijjani Reijnders cross chu Semenyo-a'n goal-ah a chantir a, VAR hmanga ennawn hnuah pawm a ni lo.

Inkhelh banah Semenyo chuan a goal khung chu pawm ngei tur a nih thu a sawi. An pawm loh chhan hi Semenyo-a'n ball a khawih hian a tibuai theitu tur Newcastle defender Malick Thiaw chu Haaland-a'n a dan vang a ni.

Referee Chris Kavanagh-a'n thutlukna siam turin hun rei tak a mamawh bawk. Guardiola chuan, "Official pali leh VAR ten thutlukna an siam thei lo a, minute ruk ngawt an mamawh," tiin thil thlen danah a lungawi lo.

Nikum November thlaa St James Park-a Newcastle an hneh loh um sawi chhuakin Pep chuan, "Helai hmunah a tho hian VAR a inrawlh lo. Minute 20-na leh 60-na kha en let ula, penalty ngei ngei tur ve ve a ni. Newcaslte khan chak an phu angin an chak a, mah se ti nge VAR a inrawlh loh. Tunah erawh minute ruk lai hun an hmang a, referee bulah engmah kan sawi a rem lo bawk," tiin a sawi.

City captain Bernardo Silva pawhin, "St James Park-a kan inkhelh hnuhnung zawkah pawh kan tana ha lo zawngin thutlukna an siam nasa. Goal kha pawm ngei tur a ni a, 3-0 a chak tur kan ni," tiin VAR thutlukna a sawisel.

Thutlukna siam turin VAR-in minute nga leh second 30 a mamawh a, VAR-a hu Stuart Attwell tana harsatna belhchhah turin semi-automated offside technology a thawk lo. Hei vang hian khawl hlui hmangin a en a ul a, offside hriat nan line a rin chawp a ngai.

Football dan anga thlir chuan Haaland a offside miau avangin referee-te thutlukna a dik theih dan a awm a, coach leh fan-te thlirna aang chuan a danglam thei thung. Haaland hian defender Thiaw leh goalkeeper Nick Pope te a tibuai chiah em tih chu a thlirtu a zirin a danglam thei ang.