Real-in fitness coach Pintus ruai

Xabi Alonso an ban hnuah Real chuan fitness coach ni turin Antonio Pintus an ruai leh ta a, coach thar Alvaro Arbeloa chu a thawhpui dawn a ni.

Alonso-a'n Real a enkawl dawn khan, Bayer Leverkusen lama a lo hlawhtlinpui tawh, fitness coach Ismael Camenforte chu a ring zawk a, Carlo Ancelotti leh Zinedine Zidane-a hnuaia awm reng Pintus a nek chhuak.

Real chuan Pintus hi Alonso-a'n duh lo mah se, hmun danga a chhuah phal loin, Performance Manager atan an ruat a, hei hi amah chelh nana post an siam chawp niin an sawi hial.

Madrid president Florentino Perez chuan Pintus hi a ngaina hle nia sawi a ni a, Real player zingah inhliam an tam chhoh phei kha chuan fitness coach-a Pintus hman leh mai duhna a lian hlawm hle.

A tawpah chuan Alonso zawk a chhuak ta a, Perez-a'n a rin em em Pintus a lo kir leh ta bawk. Real boss thar Arbeloa chuan, "Khawvela fitness coach ṭha ber pawl a ni," tiin a fak a, "Pintus hi chu a tihdan thlengin kan hria a, kan club hian kan ngeih hle," a ti bawk.

Perez chuan Champions League-a hlawhtlinna tam tak an chhar chhanah pawh, player-te fitness ṭhat theihna tura buaipuitu Pintus hi a pawimawh hle niah a ngai niin an sawi.