Fenerbahce-ah Kante kal dawn

Al Ittihad midfielder N’Golo Kante chuan Fenerbahce a zawm hnai a, Turkish club nen hian indawrna an kalpui mek niin khawthlang media-te chuan an tarlang.

Leicester City tana Premier League nomawi chawitu Kante hian Al Ittihad-a a contract chu tun nipuiah hian a hmang zo dawn a, Saudi Pro League club nen hian contract thar chungchangah an la inrem thei lo.

Hetihlai hian Fenerbahce an lo lang vat a, Chelsea midfielder hlui hi Turkey lama thlem luh tumin an dawr mek - an thlem luh theih mai an inbeisei hle niin an sawi.

Kum 34 mi Kante hian June 2023 khan Chelsea chhuahsanin, sum tamna Saudi hi a pan a, a kum tam ve deuh tawh mah se, a la rintlak viau - a tawnhriat ringawt pawh ṭangkaipui tham a ni.

France international hian World Cup 2018-ah khan an ram team chu champion puiin, Foxes bakah Chelsea chu EPL nomawi a chawipui a, Champions League-ah London club hi a champion pui bawk.

Belgium coach hlui Domenico Tedesco enkawlna hnuaia khel mek Fenerbahce-ah hian Manchester City goalkeeper hlui Ederson, Barcelona fullback hlui Nélson Semedo, Inter Milan centre back ṭhin Milan Škriniar, Manchester United midfielder hlui Fred, West Ham aṭanga loan-a an hawh mek midfielder Edson Álvarez, Real Madrid winger hlui Marco Asensio, Aston Villa forward hlui Jhon Durán, Sevilla goal thun khawl ṭhin Youssef En-Nesyri, Everton striker hlui Cenk Tosun leh Al Nassr forward hlui Talisca te ho an awm a, an chhelo hle.