Copa Del Rey : Griezmann-a'n Atletico quarterfinal a luhpui

Thawhlehni zan khan Copa Del Rey round of 16-ah Atletico Madrid-in Antoine Griezmann freekick goal hmanga Deportivo La Coruna 1-0 a hnehin quarterfinal an lut. Inkhel dangah Athletic Bilbao-in 4-3 in second divison club Cultural Leonesa an hneh a, Real Sociedad leh Osasuna te hun pangngaiah 2-2 a inhnehtawkin penalty shootout-ah Sociedad 4-3 in an vannei ta zawk.

Riazor Stadium a inkhelah mikhual team Atletico an chungnung zawk a, inkhel ṭan aṭangin chance hlauhawm nei nghalin Deportivo tlarhnung tan hna an siamsak hnem. Álex Baena, Matteo Ruggeri leh Antoine Griezmann te hmangin chance duhawm nei mah se goal hmaah an hriam tawk loh avangin first half-ah goal kan hmu lo.

Second half-ah Deportivo rawn insiamṭha hret mah se an daih rei lo, Atletico bawkin inkhel an thunun. Minute 61-naah French forward Antoine Griezmann chuan freekick aṭangin mawi takin goal awmchhun a chhuih lut a, Deportivo keeper Germán Parreño-an a en liam. Goal a khung hnuah Griezmann a hmuhnawm a, goal erawh a keng tel tawh lo. Goal a luh hnuah team pahnihte innawr mah se goal dang a luh tawh loin Atletico Madrid-in hnehna an chang.

Inkhel dangah Athletic Bilbao chuan Cultural Leonesa 4-3 in an hneh a, goal sarih luhna inkhel a hmuhnawm hle. Team nem zawka ngaih Cultural Leonesa-in Ivan Valero hmangin an khung hmasa a, Gorka Guruzeta hmangin minute 26-naah sut mah se minute khat hnuah Valero hmangin Leonesa-in hma an hruai nawn.

First half-ah goal ruk ngawt a lut a, Bilbao-in Guruzeta hmang bawkin siphurh an sut a, Ruben Sobrino penalty hmangin Leonesa-in hma hruai leh mah se penalty hmang bawkin Bilbao-in an sut a, Oihan Sancet-a'n penalty hi a khung. Halftime-ah 3-3 a ni a, second half-ah goal a lut tawh lo a, chutihrualin Bilbao player Aitor Pardes hnawhchhuah a ni thung.

Extra time khelh a ni a, player tlem zawk Bilabo-in penalty hmuin minute 104-naah Unai Gomez-a'n chakna goal a khung. Copa del Rey last 16 hi tunkara khelh zawh tur a ni a, Bilbao bakah Real Sociedad-in quarterfinal an lut tawh a ni.